Тулгар төрийн 2230 жил, Их Монгол Улс байгуулагдсаны 815 жил, Үндэсний эрх чөлөө, тусгаар тогтнолоо сэргээн мандуулсны 110 жил, Ардын хувьсгалын 100 жил, Ардчилсан хувьсгалын 32 жил, Орчин цагийн боловсрол, шинжлэх ухааны салбарын 100 жилийн ойг тохиолдуулан Монгол Улсын Ерөнхийлөгч Х.Баттулга зарлиг гарган Боловсрол, шинжлэх ухааны салбарт олон жил үр бүтээлтэй ажиллан амжилт, ажил хөдөлмөрөөрөө тэргүүлсэн МУИС-ийн зарим багш, ажилтнуудад төрийн дээд одон, медаль хүртээснийг өнөөдөр /2021.06.17/ МУИС-ийн захирал Б.Очирхуяг гардууллаа.
Хөдөлмөрийн гавъяаны улаан тугийн одонгоор МУИС-ийн Маркетинг, худалдаа тэнхимийн эрхлэгч, профессор Б.Даваасүрэн, Алтангадас одонгоор МУИС-ийн Антропологи, археологийн тэнхимийн ахлах багш Д.Долгорсүрэн, МУИС-ийн Номын сангийн Ахлах номын санч Т.Тунгалаггэрэл, Хөдөлмөрийн хүндэт медалиар МУИС-ийн Номын сангийн Номын санч Н.Наранцэцэг нар шагнагдлаа.
МУИС-ийн захирал Б.Очирхуяг “Та бүхнийгээ төрийн дээд одон медаль хүртсэнд туйлын баяртай байна. Бид багш, ажилтнуудынхаа хөдөлмөрийг цаг хугацаанд нь үнэлүүлж шагнал хүртээхийг хичээн ажиллаж байгаа. МУИС-ийн төлөө ажиллаж, хөдөлмөрлөж буй та бүхэнд эрүүл энхийг хүсье. Эрүүл байвал цаашид улам ихийг бүтээх болно” гээд амжилт хүсэв.
Төрийн дээд одонгоор шагнуулсан эрхэм багш, ажилтнууддаа аз жаргал, эрүүл энхийн ерөөл дэвшүүлье.
