МУИС-ийн Олон Улсын Харилцаа Нийтийн Удирдлагын Сургууль 2004-2005 оны хичээлийн жилээс эхлэн мэргэжлийн хичээлээр олгодог онолын мэдлэгийг дадлагаар чадавхжуулан бататгах зорилго бүхий “НҮБ-ын Загвар хуралдаан”-ыг жил бүр уламжлал болгон зохион байгуулсаар ирсэн билээ. Энэ жил 17 дахь удаагаа “Ковид 19-ийн үеийн олон улсын хамтын ажиллагаа: Уур амьсгалын өөрчлөлт” сэдвээр НҮБ-ын 60 жилийн ойн ажлын хүрээнд Монгол Улсын ГХЯ, НҮБ-ын төрөлжсөн байгууллагуудтай хамтран НҮБ-ын эрхэм зорилго, үйл ажиллагааг таниулах зорилгоор үндэсний хэмжээнд 2021 оны 10 дугаар сарын 22-23-ны өдрүүдэд зохион байгуулагдана.
60 жилийн өмнө буюу 1961 оны 10 дугаар сарын 27-ны өдөр Монгол улс НҮБ-ын гишүүн болсон түүхтэй. Эл түүхт ойг тохиолдуулан Монгол улсын ГХЯ болон НҮБ-ын Хөгжлийн хөтөлбөр (UNDP Mongolia), НҮБ-ын Олон улсын шилжилт хөдөлгөөний байгууллага (IOM Mongolia), НҮБ-ын Хүнс, хөдөө аж ахуйн байгууллага (FAO Mongolia), НҮБ-ын Хүүхдийн сан (UNICEF Mongolia) МУИС-ийн ОУХНУС-тай хамтарч буйгаараа онцлогтой. Энэ нь мөн МУИС-ийн ОУХНУС-ийн 30 жилийн ойн хүрээнд төлөвлөсөн оюутан, нийгэмд чиглэсэн ажлын нэг хэсэг юм.
Энэ сарын 8-ны өдөр манай улсын их дээд сургуулиудын оюутан залуус, ерөнхий боловсролын сургуулиудын ахлах ангийн сурагчдаас шалгарсан шилдэг 16 багийн төлөөлөгчдөд зориулан НҮБ-ын төрөлжсөн байгууллагуудын сургагч багш нар, мэргэжилтнүүд сургалт амжилттай зохион байгуулж, загвар хуралдааны бэлтгэл ажлыг хангалаа.
Эхний өдрийн сургалтыг амжилттай зохион байгуулсан НҮБ-ын Хөгжлийн хөтөлбөр (UNDP Mongolia), НҮБ-ын Олон улсын шилжилт хөдөлгөөний байгууллага (IOM Mongolia), НҮБ-ын Хүнс, хөдөө аж ахуйн байгууллага (FAO Mongolia), НҮБ-ын Хүүхдийн сан (UNICEF Mongolia) болон ОУХНУС-ийн Олон улсын харилцааны тэнхимийн багш нар, “Мини НҮБ” клубийн гишүүд, төгсөгчид мөн идэвхтэй оролцож, оюун мэдлэгээ тэлсэн эрхэм оюутан, сурагчдын төлөөлөлдөө талархлаа илэрхийлье.
