МУИС-ийн ОУХНУС-ийн Нийтийн удирдлагын тэнхимээс жил бүр уламжлал болгон зохион байгуулдаг “Нийтийн Удирдлагын Тэнхимийн 7 хоног” арга хэмжээний хүрээнд “Бакалаврын оюутнуудын нэгдсэн уулзалт”-ыг 2021 оны 10-р сарын 20-ны (цахимаар) зохион байгууллаа. Нэгдсэн уулзалтад Нийтийн удирдлагын тэнхимийн үүсгэн байгуулагч Профессор Др. Н.Бурмаа, тэнхимийн эрхлэгч Дэд. Проф. Др. Г.Баасанжав болон тэнхимийн багш нар, 2, 3, 4-р түвшний оюутнууд оролцов.
Нийтийн удирдлагын тэнхимийн 10 жилийн хугацаанд хийж гүйцэтгэсэн үйл ажиллагааны талаар товч танилцуулж, оюутнуудыг идэвх чармайлттай, хариуцлагатай, бусадтай хүндэтгэлтэй харилцаж, уламжлалт үйл ажиллагаануудад идэвхтэй оролцож, залгамж холбоотой ажиллахын чухлыг онцоллоо.
Оюутнууд бие биенээсээ харилцан суралцах нь илүү үр дүнтэй байдаг билээ. Нэгдсэн уулзалтад төрийн удирдлагын хөтөлбөрийн 4-р түвшний оюутнууд:
- Х.Гүнбилигт: НУТ-ийн дэргэдэх Мини Парламент Клубийн танилцуулга
- О.Дашдондог: Оюутны зөвлөлийн үйл ажиллагаа
- Б.Нэмүүлэн: Эрдэм шинжилгээний судалгааны ур чадвараа үр дүнтэй хөгжүүлсэн туршлага
- Р.Баярцэцэг: Сайн дурын ажилд оролцож нийгмийн идэвхтэй суралцахын ач холбогдол сэдвээр тус тус өөрсдийн туршлагаасаа хуваалцсан нь сонирхолтой байв.
Төрийн удирдлагын 4-р түвшний оюутан Б.Нэмүүлэн “Төрийн байгууллагын инноваци-Монгол Улсын цахим хөгжлийн яамны бүтэц, үүрэг, зохион байгуулалт, хүний нөөц” сэдвээр бичсэн бакалаврын судалгааны ажлын төслөө Монгол Улсын Ерөнхий сайд Л.Оюун-Эрдэнэд хүргүүлсэн нь Төрийн удирдлагын хөтөлбөрийн бакалаврын оюутнуудын эрдэм шинжилгээ, судалгаа, МУ-ын хөгжилд оруулж буй хувь нэмэр юм. Оюутан Б.Нэмүүлэндээ судалгаа, эрдэм шинжилгээний ажилд нь өндөр амжилт хүсье.
Нийтийн Удирдлагын Тэнхимийн бакалаврын түвшний нийт оюутнууддаа талархал илэрхийлж “Нийтийн Удирдлагын Тэнхимийн 10 жилийн ойн баяр”-ын мэндийг хүргэж сурлага, эрдэм шинжилгээ, судалгааны ажилд нь өндөр амжилт хүсье.
Нийтийн Удирдлагын Тэнхим
