Монгол-Оросын харилцаа, хамтын ажиллагааг өргөжүүлэн хөгжүүлэхэд оруулсан хувь нэмрийг өндрөөр үнэлж, Монгол Улс-Оросын Холбооны Улсын (ОХУ) хооронд дипломат харилцаа тогтоосны 100 жилийн ой, Монгол Улсын Их Сургуулийн (МУИС) Олон Улсын Харилцаа, Нийтийн Удирдлагын Сургууль (ОУХНУС) байгуулагдсаны 30 жилийн ойг тохиолдуулан ОХУ-аас Монгол Улсад суугаа Онц бөгөөд Бүрэн эрхт Элчин сайд Азизов Искандер Кубарович-д МУИС-ийн ОУХНУС-ийн “Хүндэт Доктор” цол олгох ёслолын үйл ажиллагаа 2021 оны 11 дүгээр сарын 10-ны өдөр зохион байгуулагдав.
Тус арга хэмжээнд МУИС-ийн удирдлага, профессор багш нараас гадна УИХ-ын гишүүн, гадаад хэргийн сайд асан Д.Цогтбаатар, ГХЯ-ны Хөрш орнуудын газрын захирал Т.Батцэцэг, ОХУ-ын ЭСЯ-ны мэргэжилтнүүд, болон Москвагийн Олон улсын харилцааны дээд сургуулийн төгсөгчдийн холбооны төлөөлөл оролцлоо.
ОХУ-ын Ерөнхийлөгчийн 2019 онд Монгол Улсад хийсэн албан ёсны айлчлалын үеэр хоёр улсын төрийн тэргүүн нар “Найрсаг харилцаа, иж бүрэн стратегийн түншлэлийн тухай Монгол Улс, ОХУ хоорондын гэрээ”-г хугацаагүйгээр байгуулсан нь хоёр орны тогтвортой, эрх тэгш, харилцан ашигтай хамтын ажиллагааг бүхий л салбарт өргөжүүлэн хөгжүүлэх нөхцөлийг бүрдүүлсэн билээ.
