Монгол Улсын Ерөнхийлөгч У.Хүрэлсүх зарлиг гаргаж, шинжлэх ухаан, техник технологи, урлаг, утга зохиолын салбарын шилдэг 4 бүтээлд Монгол Улсын Төрийн шагнал хүртээсэн билээ.
Төрийн шагнал хүртээсэн Шинжлэх ухааны гавьяат зүтгэлтэн, Хууль зүйн шинжлэх ухааны доктор, Монгол Улсын Их Сургуулийн Эмерит профессор, академич Содовсүрэнгийн Нарангэрэлийн “Чингис хааны ёс суртахуун – Эрх зүйн шастир”, “Монгол ёс суртахуун: Бадрал, уналт, эргэн сэргээлт”, “Хуулийн амин сүнс буюу Чингис хаан, монголчууд” хэмээх гурван боть болон “Ёс суртахууны цагаан толгой” хэмээх бүтээлийг “Монголчуудын ёс суртахууны үнэт уламжлал, үнэ цэн, уналт сэргэлт, монгол хүний удирдлага болгох учиртай ёс суртахууны хэм хэмжээг нэгтгэн дүгнэж, улс орны тогтвортой хөгжлийн амин сүнс нь ёс суртахуун болохыг тодотгон, хүн төрөлхтний сэтгэлгээний хөгжилд монголчуудын оруулсан үнэтэй хувь нэмрийг бодит эх баримтад түшиглэн тайлбарласан гарамгай бүтээл” гэж Монгол Улсын Ерөнхийлөгчийн зарлигт дурджээ.
Өнөөдөр /2021.12.01/ МУИС-ийн удирдлагууд Төрийн шагнал хүртсэн Шинжлэх ухааны гавьяат зүтгэлтэн, Хууль зүйн шинжлэх ухааны доктор, Монгол Улсын Их Сургуулийн Эмерит профессор, академич Содовсүрэнгийн Нарангэрэлд хүндэтгэл үзүүлэн хүлээн авч уулзлаа.
Төрт ёсны түүхт тэгш олон ой давхацсан онцгой жил оюун ухаан, авьяас билгээрээ манлайлж, шилдэг бүтээлээрээ онцгойрон шалгарч Төрийн шагнал хүртсэн МУИС-ийн Эмерит профессор С.Нарангэрэл танд МУИС-ийн эрдмийн хамт олны зүгээс амжилт, бүтээлийн дээдийг хүсэн ерөөе.
