Шинжлэх ухааны эрдэмтэн судлаач Гончиг овогтой Очирын нэрэмжит “Залуу оюутан судлаачдыг дэмжих тэтгэлэг”-ийг түүний гэр бүл, үр хүүхдүүдийн зүгээс санаачлан 2020 оноос эхлэн 2 дахь жилдээ олгож байна. МУИС-ийн Захирлын А/341 тоот тушаалаар байгуулагдсан Ажлын хэсэг нийт материалаа ирүүлсэн магистр, докторын түвшний суралцагчдыг 8 шалгуур үзүүлэлтээр дүгнэхэд хамгийн өндөр оноог Хүрээлэн буй орчин судлалын хөтөлбөрийн суралцагч Төрмөнх овогтой Тэлмэн авч “Эрдэмтэн Г.Очирын нэрэмжит залуу оюутан судлаачдыг дэмжих тэтгэлэг-2021”-ийн эзнээр тодорлоо.
Тэтгэлгийг МУИС-ийн Сургалт, оюутан хариуцсан дэд захирал Д.Бадмаанямбуу, Оюутан, төгсөгчийн хэлтсийн дарга М.Эрдэнэчимэг, Эрдэмтэн Г.Очирын гэргий З.Цэрэннадмид, хүү ХШУИС-ийн профессор О.Алтансүх нар гардуулав.
Тус тэтгэлгийн зорилго нь химийн шинжлэх ухаан болон байгаль хамгаалал-хүрээлэн буй орчны салбарт идэвхтэй сурч, судалгаа хийж буй МУИС-ийн магистрант, докторын түвшний суралцагчийн судалгааны ажлыг дэмжих, ирээдүйн шинжлэх ухааны чадварлаг мэргэжилтэн бэлтгэхэд хувь нэмрээ оруулахад оршино. Тэтгэлгийн онцлог нь сурлага, судалгаа, гадаад хэлний мэдлэгийг чухалчлах бөгөөд тухайн суралцагч өмнө нь өөр тэтгэлэг авсан буюу тэтгэлгийг давхардуулж олгодогт оршино.
Цаашид энэхүү тэтгэлгийг жил бүрийн 10 дугаар сард зарлаж, эрдэмтэн, судлаач Г.Очирын төрсөн өдөр буюу жил бүрийн 12 дугаар сарын 22-ны өдөр уламжлал болгон гардуулна.
Тэтгэлэгт шалгарсан суралцагч Т.Тэлмэн талархлын үг хэллээ. “Баярлалаа, эрдэмтэн судлаач Г.Очирын нэрэмжит энэхүү тэтгэлэгт шалгарсандаа баяртай байна. Юун түрүүнд энэ тэтгэлгийг санаачлан хэрэгжүүлэж буй эрдэмтэн Г.Очирын гэр бүлийхэнд чин сэтгэлээсээ талархаж байна. Эхлээд өөрийгөө товчхон танилцуулъя. Би 2020 онд “Хүрээлэн буй орчин судлал” магистрын хөтөлбөрт элсэн одоо 3 дахь улиралдаа суралцаж байгаа бөгөөд хүрээлэн буй орчин тэр дундаа хөрс судлалын чиглэлээр судалгаа хийдэг оюутан. Энэ мөчид хэд хэдэн хүнд талархсан сэтгэлээ илэрхийлмээр байна. Профессор Ч.Сономдагва, профессор О.Алтансүх, докторант Б.Ариунсанаа тэргүүтэй Хүрээлэн буй орчин, ойн инженерчлэлийн тэнхимийн бүх эрдэмтэн багш нартаа өөрсдийн мэдлэг, чадвараа харамгүй зааж, тусалж чиглүүлж байдагт баярлалаа. Мөн сүүлийн 4 жил миний судалгааг удирдаж, зааварлаж байгаа ШУА-ийн Газарзүй-Геоэкологийн хүрээлэнгийн Хөрс судлалын салбарын эрхлэгч, доктор О.Батхишигт баярлалаа. Эдгээр хүмүүсийн тусламжтайгаар өнөөдөр энэ тэтгэлэгт шалгарлаа. Энэхүү тэтгэлэг миний цаашдын эрдэм шинжилгээний ажлыг тэтгэхээс гадна нэрт эрдэмтний нэрэмжит тэтгэлэг хүртэж байгаа гэдэг утгаар цаашдын судалгааны ажлаа улам хичээн хийх хүсэл эрмэлзлэлийг минь маш ихээр нэмэгдүүллээ, баярлалаа”
Мэдээлэл авах утас: 77307730-1511, 91993096, n.altanzul@num.edu.mn
Оюутан, төгсөгчийн хэлтэс
