Монгол Улсын Их Сургууль, БНСУ-ын Солонгос сантай байгуулсан хамтын ажиллагааны гэрээний дагуу Солонгос судлалаар мэргэшиж буй докторант, магистрантад, БНСУ-ын Солонгос сангийн тэтгэлгийг 15 дахь жилдээ олголоо. Энэхүү тэтгэлгийн зорилго нь Солонгос судлалын ахисан түвшний суралцагчдын сурлагын амжилт, эрдэм шинжилгээ, судалгааны ажил хийх чадварлаг мэргэжилтэн бэлтгэхэд хувь нэмрээ оруулахад оршино.
2021-2022 оны хичээлийн жилийн намрын улиралд зарлагдсан тэтгэлэгт хамрагдах хүсэлт гаргасан суралцагчдын материалыг ШУС-ийн Хүмүүнлэгийн ухааны салбарын Ази судлалын тэнхимийн багш нарын бүрэлдэхүүнтэй сонгон шалгаруулах комисс сурлагын амжилт, судалгааны ажлын төлөвлөгөө, эрдэм шинжилгээний ажил хийх чадвар зэргийг харгалзан үзэн анхан шатны шалгаруулалтыг хийсэн. БНСУ-ын Солонгос сан эцсийн шатны шалгаруулалтыг хийж 5 суралцагчийг шалгаруулж тэтгэлгийг олголоо.
Тэтгэлэг гардуулах ёслолын ажиллагаанд МУИС-ийн сургалт, оюутан хариуцсан дэд захирал Б.Бадмаанямбуу, ШУС-ХУС-ийн салбар хариуцсан дэд захирал, профессор П.Дэлгэржаргал, Оюутан, төгсөгчийн хэлтсийн дарга доктор М.Эрдэнэчимэг, Ази судлалын тэнхимийн эрхлэгч, профессор Ш.Эгшиг, Ази судлалын тэнхимийн багш, профессор Д.Сайнбилэгт, Ази судлалын тэнхимийн ахлах багш Б.Дулмаа, Ази судлалын тэнхимийн ахлах багш Г.Эрдэнэчимэг нар шалгарсан суралцагч нарт сурлагын амжилт хүсэн тэтгэлгийн батламжийг гардуулан өглөө.
Тэтгэлэгт тэнцсэн суралцагчид
- Буянтогтохын Сарнай /Докторант /
- Ганхуягийн Өнөрцэцэг /Докторант/
- Батмөнхийн Сарнай /Магистрант/
- Доржсүрэнгийн Хишигжаргал /Магистрант/
- Жүгдэрдугарын Билэгжаргал /Магистрант /
Ази судлалын тэнхим
Оюутан, төгсөгчийн хэлтэс
