МУИС-д солонгос хэл–орон судлал, солонгос хэлний орчуулгын хөтөлбөрөөр суралцаж байгаа оюутнуудыг дэмжих зорилгоор олгодог БНСУ-ын иргэн МУИС-ийн ШУС-ийн ХУС-ын хүндэт профессор Квон Сонхүний нэрэмжит тэтгэлэг гардуулах ёслол 2022 оны 1 дүгээр сарын 24-ний өдөр цахимаар амжилттай зохион байгуулагдлаа.
МУ-ын Боловсролын тэргүүний ажилтан, МУИС-ийн ШУС-ийн ХУС-ын хүндэт профессор Квон Сон Хүнь нь Солонгос хэл, судлалын тэнхим байгуулагдсан цагаас эхлэн мэргэжилтэн багшаар ажиллаж, МУИС дахь солонгос судлалын сургалт судалгаа, хамтын ажиллагааг өргөжүүлэн хөгжүүлэх, Монгол дахь солонгос судлалыг хөгжүүлэх, солонгос хэл судлалын мэргэжилтэн, судлаач бэлтгэх үйлсэд үнэтэй хувь нэмэр оруулсаар ирсэн юм. Тэрээр цаг үеийн нөхцөл байдал, цар тахлын хүнд хэцүү үед солонгос хэл соёлыг амжилттай судалж буй оюутан суралцагчдадаа дэмжлэг үзүүлэн 2020-2021 оны хичээлийн жилд нийт 11 оюутанд 10 сая төгрөгийн тэтгэлгийг хувийн зүгээс олгосон юм. 2021-2022 оны хичээлийн жилд нийт 3 оюутанд 3 сая төгрөгийн тэтгэлэг гардуулж байна.
Тэтгэлэг гардуулах ёслолын арга хэмжээнд ХУС-ын дэд захирал П.Дэлгэржаргал, Ази судлалын тэнхимийн багш нарын төлөөлөл оролцож, шалгарсан оюутнуудад баяр хүргэн, цаашдын сурах үйлсэд нь амжилт хүсэн ерөөлөө.
Хүндэт профессор Квон Сонхүн оюутнуудад хандан “Тэтгэлэг авч байгаа 3 оюутан маань ковидын хэцүү нөхцөл байдалд ч гэсэн хүсэл мөрөөдлөө орхилгүй хичээнгүйлэн зүтгэж, өөрсдийн хүсэж буй зүйл рүүгээ тэмүүлж байгаад нь баяртай байна. Намайг оюутан байхад аав маань ослын улмаас хэвтэрт орж, манай ар гэрийн нөхцөл байдал хүнд хэцүү болж байсан. Тэр үед манайх ямар ч орлогогүй болж, би эгч дүүтэйгээ их сургуульд сурч байсан учраас сургалтын төлбөр төлөхөд хүндрэлтэй байсан. Гэсэн хэдий ч би тэтгэлэг авч их сургуулиа төгсч чадсан. Эргэн тойрны хайр халамж байхгүй байсан бол их сургуульд сурч чадахгүй байсан байх. Тэтгэлэг өгснөөр өнөөдрийг хүртэл авсан ач тусыг жоохон ч гэсэн хариулах болсондоо баяртай байна. Хүсэл мөрөөдлийнхөө төлөө явж амжилтад хүрч бусад хүмүүст болон нийгэмд тусалж амьдрахыг хүсэж байна. Та бүхний амьдрал гэрэл гэгээтэй аз жаргалаар дүүрэн байх болтугай” гэв.
Тэтгэлэг хүлээн авсан суралцагчдын нэрс
| № | Овог | Нэр | Хөтөлбөр | Түвшин |
| 1 | Цэнд-Аюун | Цэрэндолгор | Гадаад хэл, орон судлал (Солонгос) | 2 |
| 2 | Төрхүү | Дөлгөөн | Гадаад хэл, орон судлал (Солонгос) | 3 |
| 3 | Баянсан | Гэрэлмаа | Гадаад хэлний орчуулга (Солонгос) | 4 |
