2021-2022 оны хичээлийн жилийн намрын улирал МУИС-ийн орос хэлний хөтөлбөрийн 4-р түвшний оюутнууд ОХУ-ын Халимагийн Их сургуульд цахимаар хичээл судалж, хэл, орон судлалын дадлага хийлээ.
Монгол Улсын Их сургууль ОХУ-ын Халимагийн Их сургуультай 2000 онд хамтран ажиллах гэрээ байгуулсан билээ. 2008 оноос өнөөг хүртэл МУИС-ийн орос хэлний хөтөлбөрийн 156 оюутан Халимагийн Их сургуульд бүтэн улирлын турш суралцаж, хэл, орон судлалын дадлага хийсэн байна.
2020-2021 оны хичээлийн жилд цар тахлын улмаас оюутнууд Халимагийн Их сургуульд дадлага хийж чадаагүй. Европ судлалын тэнхим зарим хичээлийг цахимаар заах боломжийн талаар тодруулж, харилцан тохиролцож, орос хэлний 4-р түвшний 13 оюутан дээд шатны хоёр хичээлийг Халимагийн Их сургуульд цахимаар амжилттай судаллаа.
Халимагийн Их сургуулийн гадаад оюутны сургалт хариуцсан бэлтгэл факультетын захирал Староверкина Л.В, ахлах багш Бадмаева В.И нарын санаачлагаар орос хэлний салбарын оюутнууд Халимагийн үндэсний номын сангаас зохион байгуулсан “Монгол, Оросын хооронд дипломат харилцаа тогтоосны 100 жилийн ой”- д зориулсан хурал, ОХУ-ын Үндэсний эв нэгдлийн өдөр, Халимагийн ард түмний шинэ жилийн баяр болох билгийн тооллын өвлийн эхэн сарын 25 буюу “Зулын 25”-ны баярт зориулсан баярын арга хэмжээнд цахимаар оролцож, түүх, орон судлалын мэдлэг, чадвараа сайжруулсан байна.
Олон жилийн турш үргэлжилсэн орос хэлний салбарын оюутнуудын дадлага цар тахлын улмаас 1 жил тасарсан ч энэ хичээлийн жилд цахим хэлбэрээр амжилттай хэрэгжсэнд сургууль, тэнхимийн зүгээс сайшаалтай хандаж байна.
