Монгол Улсын Их Сургуулийн Хэрэглээний шинжлэх ухаан, инженерчлэлийн сургуулийн Мэдээлэл, компьютерийн ухааны тэнхим нь оюутны улсын програмчлалын олимпиадыг энэ жил хариуцан зохион байгуулж байна. МУИС-ийн түүхт 80 жилийн ойг тохиолдуулан уг ойн нэрэмжит болгон 2022 оны 5 дугаар сарын 7-8-ны хооронд зохион байгуулах юм.
Дэлхий нийтийг хамарсан цар тахлын улмаас сүүлийн хоёр жил зохион байгуулагдаагүй уг олимпиадыг энэ жил өргөн цар хүрээтэй зохион байгуулахаар төлөвлөн ажиллаж байна. Энэ удаагийн олимпиадад төр, хувийн хэвшлийн 10 гаруй их дээд сургуулиас алгоритм, програмчлалын шилдэг 50 гаруй оюутан хоёр өдрийн турш тус бүрдээ 100 онооны дөрвөн бодлогыг 4 цагийн хугацаанд бодож уралдах ба оролцогчдын бичсэн программыг хиймэл оюунд суурилсан автомат системээр шалгаж, хүний оролцоогүйгээр дүгнэнэ. Мөн олимпиадын үеэр оюутны бүтээлийн уралдаан зохион байгуулна. Бүтээлийн уралдаанд хиймэл оюун, блокчейн, метаверс технологийг ашиглан хийсэн бүтээлүүд оролцож байна.
Олимпиадын ерөнхий ивээн тэтгэгч: “Гэрэгэ системс” ХХК
Шагнал гардуулах ёслол: 2022 оны 5 дугаар сарын 8-ны 16:30 минут МУИС төв байр, 320 тоот
Холбоо барих дугаар: 95209950
