Монгол Улсад гимнастикийн спорт үүсэж хөгжсөний 100 жил, Монголын гимнастикийн холбоо үүсэн байгуулагдсаны 60 жилийн ойг тохиолдуулан Монгол Улсын Ерөнхийлөгч У.Хүрэлсүх эрхэлсэн ажил, салбартаа үр бүтээлтэй ажиллаж онцгой амжилт гарган, эх орныхоо хөгжил дэвшилд үнэтэй хувь нэмэр оруулж буй МУИС-ийн Биеийн тамирын тэнхимийн ахлах багш, Аэробик гимнастикийн олон улсын шүүгч Дорждамбын Түмэнтөгсийг төрийн дээд Алтангадас одонгоор шагнажээ.
Өнөөдөр /2022.05.09/ МУИС-ийн удирдлагууд, Биеийн тамирын тэнхимийн хамт олны хамт, шилдэг багш – дасгалжуулагч Д.Түмэнтөгсийг хүлээн авч уулзан хүндэтгэл үзүүлж, аэробик гимнастикийн спортоор олон зуун шавь нар бэлтгэн гаргасны зэрэгцээ Чийрлидингийн спортыг Монгол Улсад хөгжүүлэхэд үнэтэй хувь нэмэр оруулж буйд талархал илэрхийлж, цаашдын ажилд нь амжилт хүслээ.
МУИС-ийн Биеийн тамирын тэнхимийн ахлах багш Д.Түмэнтөгс дасгалжуулагчтай МУИС-ийн чийрлидингийн шигшээ баг Монголын оюутны спортын V наадмын чийрлидингийн тэмцээнд алтан медаль хүртэж Грек улсад зохион байгуулагдах 2022 оны оюутны дэлхийн аварга шалгаруулах тэмцээнд Монгол Улсаа төлөөлөн оролцох эрх аваад байгаа юм.
Төрийн дээд одонгоор шагнуулсан Д.Түмэнтөгс танд аз жаргал, эрүүл энхийн ерөөл дэвшүүлье.
