МУИС-ийн 2021 оны “Шилдэг түнш” байгууллагаар Монос групп шалгарсан билээ. Ковид цар тахлын хөл хорионы улмаас хойшлогдож байсан уг шагналыг гардуулан өгөх үйл ажиллагаа 05 дугаар сарын 09-ний өдөр МУИС дээр болж өнгөрөв.
МУИС, Монос групп хоёр судалгаа-сургалт-үйлдвэрлэлийн чиглэлээр хамтран ажиллах гэрээг 2011 онд байгуулснаас хойш 11 жил болж байна. Монос Хүнс ХК МУИС-ийн эзэмшлийн “Ургамлын цай, түүнийг бэлтгэх арга” патентийг лиценцийн гэрээгээр эзэмшиж, “100 наслаарай“ цай үйлдвэрлэн зах зээлийн эргэлтэнд оруулснаар 520 сая төгрөгний борлуулалт хийгдэж, МУИС-д ноогдох ашиг нь 7.2 сая төгрөг болсон байна. Одоо Гарааны Эм Би Пи Лаб ХХК-ийн лиценцийн гэрээгээр эзэмшиж буй “Залесовын зэдгэлж ургамлыг ашигласан бактерийн эсрэг бэлдмэл, түүнийг хийх арга” патент ашиглан үйлдвэрлэсэн “Фито акне” туршилтын бүтээгдхүүний сайжруулалт, маркетинг, САТРЕПС төслийн хүрээнд Биоорганик хими-Фармакогнозын лаборатори (профессор Ж.Батхүү), Ургамлын биотехнологийн лаборатори (дэд профессор Б.Даваапүрэв)-т хийгдэж буй судалгааны ажлын үр дүнг ашиглан малын тэжээлийн болон хүнсний нэмэлт бүтээгдхүүний хөгжүүлэлтийн ажил Монос Эм судлалын хүрээлэн дээр хийгдэж байна. МУИС-ийн Хүнсний шинжилгээний лаборатори (профессор Б.Батжаргал), Наношинжлэх ухаан, наноинженерчлэлийн төв (профессор Ч.Ганзориг), Генийн инженерчлэлийн лаборатори (дэд профессор О.Одгэрэл) зэрэг олон лаборатори, төв Монос групптэй хамтран ажиллаж байна.
Шагнал гардуулах ёслолын үйл ажиллагаанд МУИС-ийн захирал Б.Очирхуяг, Монос группийн Ерөнхийлөгч Л.Хүрэлбаатар тэргүүтэй 2 талын холбогдох хүмүүс оролцов. Хоёр тал хамтын ажиллагааны өнөөгийн түвшинд сэтгэл ханамжтай байгаагаа илэрхийлэхийн хамт цаашид МУИС, Монос группийн хамтарсан санхүүжүүлт бүхий судалгаа-хөгжүүлэлтийн төсөл хэрэгжүүлэх, Эм судлалын хүрээлэн дээр байгуулагдсан Зохистой дадлын шаардлага хангасан лабораторийн (GLP, Good Laboratory Practise) орон зайг хамтран ашиглах зэрэг шинэ хэлбэрээр баяжуулан, хамтын ажиллагаагаа улам өргөжүүлэн гүнзгийрүүлэхээр санал нэгдэв.
Хамтын ажиллагааны хэлтэс
Инноваци, технологи дамжуулах төв
