МУИС-ийн дүрмийн 4.3.1, 4.4.3.2 дахь хэсгийг үндэслэн МУИС-ийн захирлын тушаалаар Хууль зүйн сургуулийн захирлыг судлан шалгаруулах ажлын хэсгийг 2022 оны 4 дүгээр сарын 29-ний өдөр байгуулсан билээ. Судлан шалгаруулах ажлын хэсэг тухайн бүрэлдэхүүн сургуулийн сургалт, судалгааны ажлын онцлогийг харгалзан түүний удирдлагад тавигдах нарийвчилсан шалгуур, үзүүлэлтүүдийг тогтоож, шаардлага хангасан нэр дэвшигчдийг тодруулан 2022 оны 5 дугаар сарын 9-ний өдөр хамт олны хурлыг зохион байгуулж нууц санал хураалтыг зохион байгууллаа.
Хууль зүйн сургуулийн хамт олны хурал 90.5 хувийн ирцтэй хуралдаж захиралд нэр дэвшигчид болох Б.Амарсанаа, Т.Мэндсайхан нар тус бүр 12 минутын хугацаатай танилцуулга хийсэн бөгөөд, хуралд оролцогчдоос асуусан асуултад хариулав. Хамт олны нууц санал хураалтад хуралд оролцсон багш нар 100 хувь оролцож, Б.Амарсанаа нийт саналын 78.9 хувь, Т.Мэндсайхан нийт саналын 21.1 хувийн саналыг авсан байна.
МУИС-ийн дүрмийн 4.4.3.2 дах хэсэгт “Бүрэлдэхүүн сургуулийн захирлыг судлан шалгаруулах ажлын хэсгийг МУИС-ийн захирлын тушаалаар байгуулна. Ажлын хэсэг шаардлага хангасан нэр дэвшигчдийг тодруулж үндсэн орон тооны багш болон зөвлөх профессор, зөвлөх дэд профессор нарын 50-иас дээш хувийн ирцтэй хурлаар нууц санал хураалт явуулж, хамгийн олон санал авсан 2 нэр дэвшигчээс МУИС-ийн захирал сонгон томилно” гэж заасны дагуу судлан шалгаруулах ажлын хэсгүүд хамгийн өндөр санал авсан нэр дэвшигчдийн нэрсийг 2022 оны 5 дугаар сарын 9-ний өдөр МУИС-ийн захирлын албан үүргийг түр орлон гүйцэтгэгч Б.Очирхуягт хүргүүлсэн.
МУИС-ийн захирлын албан үүргийг түр орлон гүйцэтгэгч Б.Очирхуяг 2022 оны 5 дугаар сарын 12-ны өдөр доктор Б.Амарсанааг МУИС-ийн ХЗС-ийн захирлаар томиллоо.
