БНТУ-ын төрийн өмчит Ататурк их сургуультай (Atatürk University) МУИС хамтын ажиллагаагаа сэргээж 2022 оны 6 дугаар сард хамтын ажиллагааны санамж бичиг шинэчлэн байгуулсан. Үүний хүрээнд эрдэм шинжилгээ, судалгааны салбарт хамтын ажиллагааг эрчимжүүлэхээр тус сургуулийн Турк судлалын ахисан түвшний сургуулийн захирал Осман Мерт (Osman MERT) МУИС-д зочилж, Эрдэм шинжилгээний хэлтсийн дарга С.Должин, ШУС-ийн ХУС-ийн Ази судлалын тэнхимийн профессор Ц.Баттулга болон ХАХ-ийн төлөөлөлтэй уулзлаа. Уулзалтын үеэр уламжлалт хамтын ажиллагаатай түүх, хэл шинжлэл зэрэг нийгэм, хүмүүнлэгийн ухааны салбараас гадна эрх зүй, олон улсын харилцаа, тээвэр, боловсрол судлалын салбарт сургалт, судалгааны хүрээнд хамтын ажиллагааг өргөжүүлж ажиллахаар тохиролцов.
Мөн МУИС-ийн зүгээс эрдэм шинжилгээний солилцоог дэмжих зорилгоор Европын холбооны санхүүжилттэй Эрасмус+ төсөл, солилцооны хөтөлбөрүүдэд хамтарч ажиллах, Туркийн Засгийн газрын санхүүжилттэй Мевлана багш, оюутны солилцооны хөтөлбөр хэрэгжүүлэх хүсэлтээ илэрхийлэв.
ХАМТЫН АЖИЛЛАГААНЫ ХЭЛТЭС
