Монгол Улсын Их Сургууль үүсэн байгуулагдсаны 80 жилийн ойн баярын хуралд Монгол Улсын Ерөнхий сайдаас ирүүлсэн илгээлтийг танилцуулж байна.
МОНГОЛ УЛСЫН ЕРӨНХИЙ САЙДЫН ИЛГЭЭЛТ
Сүхбаатарын одон, Хөдөлмөрийн гавьяаны улаан тугийн одонт Монгол Улсын Их Сургууль байгуулагдсаны 80 жилийн ойд
Эрхэм хүндэт эрдэмтэн багш, сурган хүмүүжүүлэгчид, ажилтнууд аа,
Багшийн эрдмээр мэдлэг оюунд тэмүүлсэн үе үеийн төгсөгчид, оюутан залуус аа,
Монголын ирээдүй үеийг соён гэгээрүүлэх, сурган хүмүүжүүлэх их үйлсэд авьяас билиг, эрдэм оюун, хичээл зүтгэлээ зориулж буй Та бүхэндээ Монгол Улсад дээд боловсролын тогтолцоо үүсэж, Монгол Улсын Их Сургууль байгуулагдсаны түүхт 80 жилийн ойн мэндийг дэвшүүлж, баяр хүргэе.
Энэхүү тэмдэглэлт ой бол Монгол Улсын Их Сургууль төдийгүй Монгол Улсад дээд боловсролын тогтолцоо бий болсон түүхэн үйл явдал билээ.
Монгол Улсын Их Сургууль нь 1942 оны 10 дугаар сарын 5-ны өдөр байгуулагдаж, 1946 онд анхны төгсөлтөө хийснээс хойш 100 мянга гаруй их сургуулийн боловсролтой мэргэжилтэн бэлтгэж, бакалавр, магистр, докторын сургалт явуулдаг Монгол Улсын боловсрол, шинжлэх ухааны тэргүүлэгч гол төв болон хөгжсөн юм.
Монгол Улсад дээд боловсролын системийн үндсийг тавьж, дээд боловсролтой мэргэжилтнийг анхлан бэлтгэн, шинжлэх ухааны олон салбарт сургалт, судалгааны ажлыг эхлүүлж, шинжлэх ухааны сэтгэлгээг хөгжүүлэн төлөвшүүлж, Монгол Улсын боловсрол, соёл, шинжлэх ухаан, нийгэм, эдийн засаг, хүмүүнлэгийн салбар, улс орныхоо хөгжил дэвшилд үнэлж баршгүй хувь нэмэр оруулсан үе үеийн эрдэмтэн багш, оюутан, ажилтан, албан хаагчдын хичээл зүтгэлийг бахархан тэмдэглэж байна.
Монгол Улсын Их Сургуулийн багш судлаачид, ажилтнууд, оюутан суралцагчид, төгсөгчид Та бүхэн бол XX зууны шинэ Монгол Улсыг бүтээсэн, хурдтай өөрчлөгдөн дижиталчлагдаж, улам бүр даяаршиж буй өнөөгийн зуунд ч хөгжлийн түүчээ, манлайлагч байр сууриа улам батжуулан явж байгаа гэдэгт итгэл төгс байна.
Боловсрол бол бидний ирээдүй мөн. Монгол Улсын Засгийн газраас монгол хүний дэлхийн түвшинд өрсөлдөх чадварыг нэмэгдүүлэх, хүүхэд залуусыг суралцах тэгш боломжоор хангах, чанартай боловсролыг идэвхжүүлэх зорилгоор боловсролын салбарын эрх зүйн цогц шинэчлэлийг хэрэгжүүлж байна.
Боловсролын цогц шинэчлэлийн үр дүнд цахим боловсрол болон үр дүнд суурилсан үнэлэмжийн тогтолцоог бий болгож, багш суралцагчдын ажиллах, суралцах орчныг сайжруулан, их, дээд сургуулийг нэгдсэн стандартад оруулж, өрсөлдөх чадварыг нэмэгдүүлэхэд томоохон дэвшил гарах болно.
Эрдэмт багш нарын мятаршгүй зүтгэл, ирээдүй үеийн мэдлэг оюуны шавхагдашгүй хүчээр эрдмийн хэт цахиж, хөгжлийн гал бадрах болтугай.
МОНГОЛ УЛСЫН ЕРӨНХИЙ САЙД
ЛУВСАННАМСРАЙН ОЮУН-ЭРДЭНЭ
2022 оны 10 дугаар сарын 5-ны өдөр
Улаанбаатар хот
