Монгол Улсын Их Сургууль үүсэн байгуулагдсаны 80 жилийн ойн Баярын хурал ёслол төгөлдөр боллоо.
Дээд боловсролын ууган байгууллага Монгол Улсын Их Сургуулийн түүхт 80 жилийн ойн баярын хурлыг нээж Улсын Их Хурлын дарга Г.Занданшатар үг хэлж, Боловсрол, шинжлэх ухааны сайд Л.Энх-Амгалан мэндчилгээ дэвшүүлсэн юм.
Монгол Улсын Их Сургууль үүсэн байгуулагдсаны 80 жилийн ойн Баярын хуралд Монгол Улсын Ерөнхийлөгч У.Хүрэлсүх мэндчилгээ ирүүлж, Монгол Улсын Ерөнхийлөгчийн Боловсрол, шинжлэх ухаан, технологийн зөвлөх Ч.Лодойравсал уншиж танилцуулав. Монгол Улсын Ерөнхий сайд Л.Оюун-Эрдэнийн илгээлтийг Монгол Улсын Ерөнхий сайдын зөвлөх Я.Төмөрбаатар уншиж танилцууллаа.
Баярын хуралд МУИС-ийн захирал, доктор Б.Очирхуяг “МУИС-Одоо ба ирээдүй” үндсэн илтгэлийг танилцуулж ирээдүйд ямар түвшинд хүрэхээр зорин ажиллаж буйгаа баярын хуралд оролцсон төр засгийн төлөөлөл, эрдэмтэн багш, ажилтнууд, суралцагч, төгсөгч, хамтын ажиллагаатай 36 орны 60 гаруй зочид төлөөлөгчдөд танилцуулсан юм.
“МУИС-Одоо ба ирээдүй” илтгэл
Баярын хуралд МУИС-ийн анхны гадаадын түнш сургууль, Москвагийн их сургуулийн захирал, МУИС-ийн Хүндэт доктор, академич Виктор Антонович Садовничий видео мэндчилгээ илгээж баярын мэндчилгээ дэвшүүлсэн юм. Мөн Сөүл Үндэсний Их Сургуулийн ерөнхийлөгч У Сэ Жон баярын хуралд оролцсон нийт зочид төлөөлөгчдөд мэндчилгээ дэвшүүлж үг хэлэв.
Монгол Улсын Их Сургууль үүсэн байгуулагдсаны 80 жилийн ойн Баярын хуралд ахмад багш нарыг төлөөлөн 1989-1996 онд МУИС-ийн захирлаар ажиллаж байсан, Монгол Улсын Гавьяат багш, доктор, профессор Д.Дорж хүндэтгэлийн үг хэлсэн бол, суралцагчдыг төлөөлөн МУИС-ийн Оюутны холбоо, Оюутан конгрессийн тэргүүн А.Оюун-Эрдэнэ үг хэллээ.
МУИС-ийн Эрдмийн хамт олон
