МУИС-ийн Удирдах зөвлөл (УЗ)-ийн ээлжит хурал 2023 оны 06 дугаар сарын 02-ны өдөр болж дараах асуудлыг хэлэлцэв. Үүнд:
1. Удирдах зөвлөлийн дарга сонгох тухай;
2. МУИС-ийн 2022 оны санхүүгийн тайлан, Аудитын дүгнэлтийн тухай;
3. Хичээлийн жилийн үйл ажиллагааны тайлангийн тухай
Боловсролын, шинжлэх ухааны сайдын А/504 тушаалын дагуу МУИС-ийн УЗ-д БШУЯ-аас гурван хүн томилогдлоо. Тодруулбал, Засгийн газрын хэрэг эрхлэх газрын тэргүүн дэд дарга Б.Ганбат, Боловсрол, шинжлэх ухааны сайдын зөвлөх М.Батгэрэл, Боловсрол, шинжлэх ухааны яамны Хяналт-шинжилгээ, үнэлгээ, дотоод аудитын газрын дарга Н.Нарангэрэл нар сонгогдов. УЗ-ийн хуралдаанд оролцсон гишүүдийн 100 хувийн саналаар М.Батгэрэлийг УЗ-ийн даргаар сонгож, ажиллуулахаар тогтлоо. МУИС-ийн нийт багш нарын нээлттэй сонгон шалгаруулалтаар ШУС-ийн Түүхийн тэнхимийн багш профессор П.Дэлгэржаргал 33.92 хувийн санал авч, энэ өдрөөс эхлэн УЗ-ийн гишүүнээр ажиллахаар болов.
МУИС-ийн 2022 оны санхүүгийн тайланд хийсэн Аудитын дүгнэлтийг хүлээн зөвшөөрлөө. Аудитаар илэрсэн зөрчлийг шийдвэрлэж, цаашид Нягтлан бодох бүртгэлийн тухай хууль бусад хууль тогтоомжийн хүрээнд алдаа зөрчил гаргахгүй ажиллахыг захирал (Д.Бадарч), Санхүү, хөрөнгө оруулалт эрхэлсэн захирал (Ч.Энхбаяр) нарт даалгав.
Хуралдааны төгсгөлд УЗ-ийн гишүүд МУИС-ийн 2021-2022 оны хичээлийн жилийн үйл ажиллагааны тайланг хэлэлцэж, сайшаав. Мөн тус тайланг МУИС-ийн нийт эрдмийн хамт олонд түгээхийг МУИС-ийн Захирлын ажлын албаны дарга (Н.Баатарбилэг)-д үүрэг болголоо.
Захирлын ажлын алба
