МУИС-ийн багш, судлаачдын судалгааны үр дүн, оюуны өмчийг эдийн засгийн эргэлтэд оруулах, их сургууль аж үйлдвэрийн хамтын ажиллагааг өргөжүүлэхэд багш, оюутны хамтын оролцоог идэвхжүүлэх, гарааны компани байгуулахад дэмжлэг үзүүлэх зорилгоор зохион байгуулагдаж буй “Багш, оюутны стартап 2023” хөтөлбөр амжилттай хэрэгжиж байна.
Тус хөтөлбөрийн хэрэгжилтийн хүрээнд МУИС-ийн Бизнесийн сургуулийн Бизнес консалтинг төвтэй хамтран “Компанийн засаглал” эрчимжүүлсэн богино хугацааны сургалт зохион байгууллаа.
Санхүүгийн Зохицуулах хорооноос албан ёсоор итгэмжлэгдсэн тус сургалтыг 2023 оны зургаадугаар сарын 15, 16-ны өдөр зохион байгуулсан бөгөөд Бизнесийн сургуулийн Менежментийн тэнхимийн ахлах багш С.Санасэр “Компанийн засаглалын тухай ойлголт, Төлөөлөн удирдах зөвлөл, Гүйцэтгэх удирдлага, Компанийн нийгмийн хариуцлагын тухай”, Бизнес Консалтинг төвийн захирал, дэд профессор Ө.Гэрэлт-Од “Корпорацын санхүү, Тайлагнал ба ил тод байдал, Эрсдэлийн удирдлага, Байгууллагын эрсдэлийн удирдлага буюу компанийн дотоод хяналтын тогтолцооны тухай”, Хууль зүйн сургуулийн захирал, профессор Б.Амарсанаа “Компанийн засаглалын хууль эрхзүйн орчин, Их хэмжээний болон сонирхлын зөрчилтэй хэлцлийн тухай” тус тус сургалт орлоо.
Тус сургалтаар зөвхөн компанийн засаглал төдийгүй менежмент, санхүү, хууль эрхзүйн цогц, уялдаатай мэдлэг олгосон ба энэхүү сургалтад “Багш, оюутны стартап 3.0” хөтөлбөрт оролцож буй 14 багийн төлөөллүүд хамрагдаж, сертификат гардан авлаа.
