МУИС-ийн ШУС-ийн дэргэдэх Судалгааны Ёс Зүйг Магадлах Зөвлөл (Institutional Review Board) нь 2023 oны нэгдүгээр сараас эхлэн үйл ажиллагаагаа явуулж байгаа билээ. 2023 оны хаврын улирлаар тус зөвлөл нь нийт зургаан удаа хэлэлцүүлэг хийж, дөрвөн хүсэлтэд ёс зүйн зөвшөөрөл олгосон ба үүнд олон улсын хамтарсан гурван төсөл, Тайван Улсын их сургуулийн магистрын судалгааны ажлын ёс зүйн зөвшөөрлийг олгожээ.
Судалгааны үйл явцын чухал хэсэг бол судалгааны ёс зүйн хэм хэмжээг баримтлан ажиллах байдаг. Иймд та бүхэн судалгааны ёс зүйн зөвшөөрөл авах бол irb@num.edu.mn болон https://sas.num.edu.mn/irb/ хаягт хүсэлтээ илгээнэ үү. Зөвшөөрөл олгоход бүрдүүлэх баримт, бичгийг сар бүрийн нэгдүгээр долоо хоногийн баасан гарагийн 17:00 цаг хүртэл хүлээн авч, тасалбар болгоно.
Судалгааны Ёс Зүйг Магадлах Зөвлөлд ажиллаж буй гишүүд:
- Зөвлөлийн дарга: Ч. Тамир (Багш оюутны хөгжил Нийгмийн Ухааны салбар хариуцсан дэд захирал)
- Гишүүд: Н. Алтантөгс (Эрдэм шинжилгээний бодлого зохицуулалт Хүмүүнлэгийн Ухааны салбар хариуцсан дэд захирал)
- А. Батхишиг (Социологи, Нийгмийн ажлын тэнхимийн дэд профессор)
- Ц. Нямсүрэн (Философи, шашин судлалын тэнхимийн дэд профессор)
- Б. Отгонтөгс (Эдийн засгийн тэнхимийн профессор)
- Б. Очирхуяг (Биологийн тэнхимийн дэд профессор)
- И. Саруул (Химийн тэнхимийн дэд профессор)
- Ө. Энэрэлт (Биологийн тэнхимийн дэд профессор)
- Нарийн бичгийн дарга: Д. Золжаргал (Гадаад хэлний төвийн тэнхимийн дэд профессор)
Ёс зүйн зөвшөөрлийн хүсэлт илгээхэд бүрдүүлэх баримт бичиг:
- Судлаачийн овог нэр, хэлэлцүүлэх ажлын нэр, ямар нэгж, байгууллагаас мэдүүлэг гаргаж байгааг тусгасан судалгаа хийх ёс зүйн зөвшөөрөл хүссэн өргөдөл
- Хэлэлцүүлэх ажлыг 150 үгэнд багтаан товчилсон танилцуулга
- Тус ажлын арга, аргачлалын талаар дүгнэсэн харьяа тэнхимийн эрхлэгч болон мэргэжлийн шинжээчийн тодорхойлолт
- Хэрэв хүнийг хамруулсан судалгаа бол таниулсан зөвшөөрлийн хуудас болон Хавсралт 2-н асуултад хариулсан байх
- Хэрэв амьтныг хамруулсан судалгаа бол Хавсралт 3-н асуултад хариулсан байх
- Гаднын байгууллагатай хамтарсан эсвэл санхүүжилт авч байгаа бол тухайн байгууллагын ёс зүйн хяналтын зөвлөлийн зөвшөөрлийн хуулбарыг албан ёсны орчуулгын хамт илгээх
- Тухайн төсөл, эрдэм шинжилгээ, судалгааг хийх байгууллагын зөвшөөрөл бүхий албан бичиг
- Төлбөрийн баримт (материал хүлээн авсны дараа мэйлээр холбогдон төлбөрийн зааварчилгааг өгнө)
