Япон Улсаас Монгол Улсад суугаа Онц бөгөөд Бүрэн эрхт Элчин сайд Кобаяши Хироюки-д Шинжлэх ухааны сургуулийн “Хүндэт доктор” цол олгох ёслолын ажиллагаа 11 дүгээр сарын 20-ны өдрийн 11:00 цагаас МУИС-ийн нэгдүгээр байрны Эрдмийн танхимд боллоо.
Элчин сайд Кобаяши Хироюкид Монгол Улс хийгээд МУИС дахь япон хэлний сургалт, судалгааг хөгжүүлэх, Байгалийн ухааны салбар дахь хамтын ажиллагаа, МУИС-ийн сургалт судалгааны орчныг бэхжүүлэхэд оруулсан жинтэй хувь нэмрийг нь өндрөөр үнэлэн, уг цолыг олгохоор шийдвэрлэжээ. Элчин сайд Х.Кобаяши МУИС-ийн Шинжлэх ухааны сургуулийн хүндэт доктор цолыг хүртэж байгаа анхны эрхэм юм.
Ёслолын ажиллагаанд МУИС-ийн захирал Д.Бадарч, захиргааны зөвлөлийн төлөөлөл, Японы Элчин Сайдын Яамны төлөөлөл, ШУС-ийн Эрдмийн Зөвлөлийн гишүүд, Япон улсад докторын зэрэг хамгаалсан төгсөгчдийн төлөөлөл, Ази судлалын тэнхимийн Япон судлалын хөтөлбөрийн багш, оюутнууд, түүнчлэн япон хэлийг сонирхон судалж буй бусад оюутан оролцлоо.
