БНСУ-ын Хүний Нөөцийн Удирдлагын сайд Ким Сын Хо төлөөлөгчдийн хамт 2024 оны гуравдугаар сарын 21-ний өдөр МУИС-д айлчлан, хамтын ажиллагааны санамж бичигт гарын үсэг зурлаа. Цаашид МУИС болон тус яам хооронд “Харьцуулсан төрийн үйлчилгээний тогтолцоо”, “Харьцуулсан хүний нөөцийн менежмент” зэрэг сэдвээр хамтарсан судалгаа хийж, багш, ажилтан солилцох боломж бүрдэж байна.
Мөн санамж бичгийн хүрээнд МУИС, УТСОУХНУС, Нийтийн удирдлагын тэнхимийн хичээлийн хөтөлбөрт “Төрийн удирдлага” хичээл нэмэгдэж буй бөгөөд тус хичээлээр оюутнууд Монгол, БНСУ болон бусад улсын “төрийн үйлчилгээний тогтолцоо”-г харьцуулан судлах юм.
МУИС-ийн ректор Д.Бадарч уулзалтын үеэр Монгол Улсад хүний нөөцийн асуудал тулгамдаж буй хийгээд МУИС-ийн боловсруулж буй хөгжлийн шинэ стратегид авьяасыг нээн илрүүлж, татахад өндөр ач холбогдол өгч байгаа тул энэ талбарт БНСУ-ын Хүний нөөцийн удирдлагын яамтай амжилттай хамтын ажиллагаа өрнүүлнэ гэдэгт итгэж буйгаа илэрхийллээ.
БНСУ-ын Хүний нөөцийн удирдлагын сайд Ким Сын Хо өнгөрсөн хугацаанд Монгол улстай төрийн алба хаагчдыг мэргэшүүлэх, хүний нөөцийг чадавхижуулах чиглэлд идэвхитэй хамтран ажиллаж ирсэнийг дурдаад цаашид МУИС-тай боловсролын салбарт туршлага солилцох болсондоо баяртай байгаагаа хэлэв.
Уг арга хэмжээнд МУИС-ийн талаас ректор Д.Бадарч, УТСОУХНУС-ийн захирал С.Мөнхбат, Нийтийн удирдлагын тэнхимийн эрхлэгч Г.Баасанжав, профессор Н.Бурмаа, ахлах багш Г.Мягмар нар, ЗГХЭГ-ын даргын зөвлөх Ү.Амарбатаар ахлуулсан төлөөлөгч нар, БНСУ-ын Хүний нөөцийн удирдлагын яамны талаас тус яамны сайд Ким Сын Хо, Хүний нөөцийн удирдлагын газрын захирал Чун Жи Юүн, Сайдын ажлын албаны дарга И Ён Ин, Олон улсын хамтын ажиллагааны газрын захирал И Ин Хё, Сайдын ажлын албаны дэд дарга Жун Чан Хва, Олон улсын хамтын ажиллагааны газрын дэд захирал Нам Кван Тэк нар оролцлоо.
