МУИС-ийн багш, ажилтны баг “МУИС-ийн сорилго-2024” арга хэмжээг 2024 оны дөрөвдүгээр сарын 04-07-ны өдөр Дорнод аймгийн Чойбалсан хотод зохион байгууллаа.
Уг арга хэмжээг дараах дөрвөн чиглэлийн хүрээнд явуулав. Үүнд:
- Дорнод аймгийн бүх ЕБС-ийн төгсөх ангийн сурагчдад зориулж, МУИС-ийн багш нар Байгалийн ухааны хичээлүүдээр арга зүйн зөвлөмж өгөх, лекц унших, МУИС-ийн оюутан элсүүлэх үйл ажиллагаа, оюутныг дэмжих үйлчилгээг танилцуулах,
- Дорнод аймгийн ЕБС-ийн байгалийн ухааны хичээл заадаг багш нарт зориулан МУИС-ийн багш нар чадавхжуулах сургалт зохион байгуулах,
- Дорнод аймгийн ЕБС-ийн төгсөх ангийн сурагчдад зориулан математикийн хичээлээр “МУИС-ийн Сорилго-2024”-ийг зохион байгуулах,
- МУИС-ийн Зүүн бүсийн сургуулийн багш, суралцагчдад мэргэжлийн хөтөлбөр, сургалтын орчин, оюутныг дэмжих үйлчилгээг танилцуулах гэсэн арга хэмжээнүүдийг тусгай хөтөлбөрийн дагуу хэрэгжүүлэв.
Математикийн багш, сурагчдын сургалт
Математикийн багш, сурагчдад зориулсан сургалтыг Мэдээллийн технологи, электроникийн сургуулийн Хэрэглээний математикийн тэнхимийн багш, дэд профессор С.Батбилэг удирдан явуулав.
Физикийн багш, сурагчдын сургалт
Физикийн багш, сурагчдын сургалтыг МУИС-ийн Шинжлэх ухааны сургуулийн Физикийн тэнхимийн багш доктор (Ph.D), профессор Д.Улам-Оргих явуулав.
Химийн багш, сурагчдын сургалт
Химийн багш, сурагчдад зориулсан сургалтыг МУИС-ийн Шинжлэх ухааны сургуулийн Химийн тэнхимийн багш, профессор Ц.Даржаа удирдан явуулав.
Биологийн багш, сурагчдыг сургалт
Биологийн багш, сурагчдын сургалтыг Шинжлэх ухааны сургуулийн Биологийн тэнхимийн ахлах багш Ч.Баттулга удирдан явуулав.
Багшийн хөгжил, боловсролын менежмент
Дорнод аймгийн ЕБС-ийн багш нарт “Багшийн хөгжил, боловсролын менежмент” сэдвээр, ЕБС-ийн сурагчдад “Боловсролын нийгэмд гүйцэтгэх үүрэг” сэдвээр МУИС-ийн Шинжлэх ухааны сургуулийн Боловсрол судлалын тэнхимийн ахлах багш, доктор (Ph.D) Ургамалын Лхагвасүрэн сургалт зохион байгуулав.
“МУИС-ийн Сорилго-2024”-ийг Математикийн хичээлээр зохион байгуулав.
Дорнод аймгийн хэмжээнд математикийн хичээлээр элсэлтийн шалгалт өгөх 503 сурагч байгаа бөгөөд ЭЕШ-д бэлтгэх зорилгоор аймагтаа 4 удаагийн сорилгыг зохион байгуулсан байна. Энэхүү дөрвөн удаагийн сорилын үр дүнг нэгтгэн эрэмбэлж эхний 100-д шалгарсан сурагчдыг “МУИС-ийн сорилго-2024”-д оролцуулахаар комисс шийдвэрлэлээ. Сорилын агуулгыг С.Батбилэг багш боловсруулсан бөгөөд 1-3 дугаар байр эзэлсэн сурагчдыг өргөмжлөл, мөнгөн шагналаар урамшуулав. Үүнд:
- I байр: Хан-Уул сургуулийн 12б ангийн сурагч Батжаргалын Номинжин 94.5 хувийн гүйцэтгэлээр,
- II байр: 12-р сургуулийн 12б ангийн сурагч Энхжаргалын Ану 84.9 хувийн гүйцэтгэлээр,
- III байр: Долоодой сургуулийн 12а ангийн сурагч Одбаярын Өсөхбаяр 82.2 хувийн гүйцэтгэлээр тус тус шалгарлаа.
МУИС-ийн Зүүн бүсийн сургуулийн суралцагчдад МУИС-ийн “Оюутны хөгжлийн хөтөлбөр”, оюутныг дэмжих үйлчилгээг танилцуулах сургалт зохион байгуулав.
МУИС-ийн Зүүн бүсийн сургуулийн нийт багш, суралцагчдад МУИС-ийн “Оюутны хөгжлийн хөтөлбөр” болон Оюутныг дэмжих үйлчилгээний талаар МУИС-ийн Оюутны хөгжлийн төвийн эрхлэгч доктор М.Эрдэнэчимэг танилцуулав. Танилцуулгын үеэр Оюутны хөгжлийн бодлогын газрын мэргэжилтэн С.Дэлгэр тус сургуулийн суралцагчдаас Оюутны хөгжлийг дэмжих үйл ажиллагааны талаар санал асуулга авлаа.
МУИС-д хэрхэн элсэн суралцах, элсэлтийн үйл ажиллагаа талаарх танилцуулга
Дорнод аймгийн ЕБС-ийн төгсөх ангийн сурагчдад МУИС-д хэрхэн элсэн суралцах, элсэлтийн үйл ажиллагаа талаар Оюутны хөгжлийн төвийн мэргэжилтэн Ж.Оюунбилэг танилцуулав.
Энэ удаагийн багш, сурагчдад зориулсан сургалтад байгалийн ухааны 130 гаруй багш, 500 орчим сурагчид хамрагдлаа. Үйл ажиллагааны зохион байгуулагчаар МУИС-ийн Зүүн Бүсийн Сургууль, МУИС-ийн харьяа Дорнод аймаг ахлах сургууль болон аймгийн Боловсрол, шинжлэх ухааны газар хамтарсан ажилласан бол “Дорнод гурил” ХХК ивээн тэтгэж дэмжлээ.
ОЮУТНЫ ХӨГЖЛИЙН БОДЛОГЫН ГАЗАР
ОЮУТНЫ ХӨГЖЛИЙН ТӨВ
