Улаанбаатар дахь Бүгд Найрамдах Польш Улсын Элчин сайдын яам нь Монгол Улсын Их сургуулийн Бизнесийн сургууль болон Польшийн Шинжлэх ухааны байгууллагын удирдлагын нийгэмлэгийн Люблин дахь салбартай хамтран “Contemporary Business Challenges. Polish-Mongolian Exchange of Experiences” сэдэвт Польш-Монголын хамтарсан эрдэм шинжилгээний бага хурлыг 2024 оны тавдугаар сарын 02-ны өдөр МУИС-ийн Номын сангийн хурлын танхимд амжилттай зохион байгууллаа.
Эрдэм шинжилгээний бага хурал нь Польш, Монголын улс төр, эдийн засгийн өөрчлөлт шинэчлэлтийн туршлага, худалдаа, эдийн засгийн хамтын ажиллагааны өнөөгийн байдал болон цаашид өргөжүүлэн хөгжүүлэх боломж зэрэг сэдвийг хөндсөн өндөр ач холбогдол бүхий арга хэмжээ боллоо.
Бага хуралд Бүгд Найрамдах Польш Улсаас Монгол Улсад суугаа Элчин сайдын яам, Польш Улсын Варшавын Их сургууль, Ягеллоны Их сургууль, Люблинийн Технологийн Их сургууль, Варшавын Эдийн засгийн сургууль, Вроцлавын Их сургууль, Катовицийн Бизнесийн их сургууль, Ченстоховын Технологийн Их сургууль, Лодзийн Технологийн Их сургуулийн төлөөлөл мөн Монгол Улсад суугаа хөрөнгө оруулалт, худалдааны агентлаг, Монгол Улсын Батлан хамгаалахын эрдэм шинжилгээний хүрээлэн, МУИС-ийн Улс төр судлал, олон улсын харилцаа нийтийн удирдлагын сургууль, Бизнесийн сургуулийн төлөөлөл болох нийт 20 гаруй тэргүүлэх зэргийн эрдэмтэн, судлаачид оролцож илтгэл танилцуулан амжилттай оролцлоо.
Эрдэм шинжилгээний бага хурлын хаалтын үйл ажиллагааны дараа хамтын ажиллагааны гэрээнд гарын үсэг зурах арга хэмжээ зохион байгууллаа. Тус арга хэмжээнд Ягеллоны Их сургуулийн Профессор Лукаш Гацек болон МУИС-ийн Улс төр судлал, Олон улсын харилцаа, нийтийн удирдлагын сургуулийн захирал Профессор С.Мөнхбат мөн Люблин дахь салбарын Шинжлэх ухааны байгууллагын удирдлагын нийгэмлэгийн тэргүүн Профессор Эва Бояар болон МУИС-ийн Бизнесийн сургуулийн захирал Профессор Н.Батнасан нар хамтын ажиллагааны гэрээнд тус тус гарын үсэг зурлаа.
