Олон улсын оюутны асуудал, үйлчилгээний холбоо (IASAS) дэлхийн 95 орны 1500 гаруй дээд боловсрол эрхэлсэн төрийн захиргааны байгууллага, их, дээд сургууль, хувь хүний гишүүнчлэлтэй, дэлхийн долоон бүс нутагт салбартайгаар үйл ажиллагаагаа явуулдаг оюутны хөгжил, үйлчилгээний олон улсын байгууллага юм. Тус холбоо нь дээд боловсролын засаглал, санхүүжилт, оюутны хөгжил, үйлчилгээний чиглэлээр дэлхийн нийтийн орчин үеийн чиг хандлагыг хэлэлцэж, оюутны хөгжил, үйлчилгээ эрхэлсэн манлайлагч, мэргэжилтнүүдийн мэдлэг, мэргэжлийн ур чадварыг сайжруулах, харилцан мэдээлэл солилцох зорилготой.
МУИС-ийн Оюутны хөгжлийн газрын дарга др. Б.Цэцэнцолмон уг холбооны ерөнхийлөгч Др.Биргит Шрайбер, нарийн бичгийн дарга др. Лиза Бардил Москаритоло нартай 2024 оны наймдугаар сарын 30-нд цахим уулзалт байгуулав. Энэ үеэр МУИС-ийн оюутанд чиглэсэн хөгжлийн хөтөлбөр, үйлчилгээг танилцуулж, гишүүн болох хүсэлтээ илэрхийлснээр Монгол Улсаас элссэн анхны идэвхтэй гишүүн түнш байгууллага боллоо.
Олон улсын оюутны асуудал, үйлчилгээний холбооны гишүүн болсноор оюутан бүрд хүрч үйлчлэх, их сургуулийн таатай орчин нөхцөл бүрдүүлэхэд чиглэсэн манлайллын сургалт хөтөлбөр, уулзалт зөвлөгөөнд оролцож, мэргэжлийн чадавх бэхжүүлэх, үйлчилгээний чанар сайжруулах таатай боломж бүрдэж байна.
