“Торгоны Замын Их Сургуулиудын Сүлжээ” олон улсын байгууллагын IX ерөнхий ассамблей, Торгоны замын судалгааны олон улсын холбооны эрдэм шинжилгээний VIII хурал “Торгоны замын их сургуулиудын сүлжээний гишүүн их сургуулийн хооронд бат бэх, эрчимтэй хамтарсан судалгааг хөгжүүлэх” уриа доор Италийн Наполийн Их Сургууль дээр 2024 оны 11 дүгээр сарын 12-14-нд амжилттай зохион байгуулагдав. Уг сүлжээнд 28 орны 63 хотын 81 их сургууль гишүүн байгууллагаар бүртгүүлэн хамтран ажиллаж байна.
2024 оны үйл ажиллагаанд уг сүлжээний гишүүн их сургуулиудын ректор, проректор, хамтын ажиллагаа эрхэлсэн захирлууд оролцож, уг байгууллагын 2024 оны үйл ажиллагаа болон аудитын тайланг сонсож, 2025 оны ажлын төлөвлөгөөнд гишүүн орнуудын саналыг хэлэлцэн, 2025 онд уг үйл ажиллагааг Узбекистан Улсад зохион байгуулах талаар хэлэлцэв.
Монгол Улсаас МУИС-ийн Судалгаа, хамтын ажиллагаа эрхэлсэн проректор проф. С.Гомбобаатар, ШУС-ийн Монгол хэл, хэл шинжлэлийн тэнхимийн Монгол хэл шинжлэлийн хөтөлбөрийн 4-р түвшний оюутан Э.Бямбасүрэн нар урьсан талын зардлаар, мөн Соёл, Урлагийн Их Сургуулийн төлөөлөл оролцов. “Торгоны Замын Их Сургуулиудын Сүлжээ” байгууллагын оюутны нэгдсэн холбооноос зохион байгуулсан эсээ бичлэг болон гэрэл зургийн уралдаанд шалгарсан оюутнууд шагналаа гардан авлаа. МУИС-ийн оюутан Э.Бямбасүрэн “Торгоны зам дагуух улс орнуудын байгаль, газар нутагт орчин цагийн уур амьсгалын нөлөөлөл ба модод” сэдвээр бичсэн эсээгээрээ шилдгийн шилдгээр шалгарч, оюутны хуралдаанд илтгэл амжилттай хэлэлцүүллээ.
Уг уулзалтын үеэр МУИС нь Казакстаны Ал Фараби Казакын Үндэсний Их Сургууль, Жорданы Мута Их Сургууль, Арабын Нэгдсэн Эмират Улсын Канадын Дубайн Их Сургууль, Энэтхэгийн Дели Их Сургуулийн ректоруудтай уулзаж, хамтран ажиллах санамж бичигт гарын үсэг зурахаар тохиролцон, улмаар Казакстаны Их Сургуулийн санамж бичгийн заалтыг хоёр талаасаа тохирч, бэлэн болгоод байна. Мөн Ассамблейд МУИС-ийн төлөөлөл илтгэл хэлэлцүүлэн “Нүүдэлчдийн амьдрал ба байгаль хамгаалал” зуны сургалтыг зохион байгуулах саналыг тавьж, сүлжээний зүгээс дэмжин ажиллахаа илэрхийлэв. Мөн МУИС-аас тавьсан “Silk Road Forum Nature and Climate Change” санаачилгыг Энэтхэгийн Дели Их Сургуулийн баг дэмжиж хамтран ажиллахаар боллоо.
/Дээрх сургуулиудтай хамтран ажиллах саналыг МУИС-ийн багш нараас авч байна./
