МУИС-ийн авьяаслаг оюутан залуус энэ сарын 20-25 ны өдрүүдэд Тайваньд “Оюутны хамтарсан тоглолт” хийгээд ирлээ. Монгол үндэстний язгуур урлагийг Тайваны залууст таниулах, сурталчлах, хоёр орны залуусын хамтын ажиллагааг идэвхижүүлэн хөгжүүлэх, соёлын солилцоог бий болгох зорилго бүхий энэхүү тоглолтыг Тайваны Их Сургуулийн урилгаар МУИС-ийн Оюутанд үйлчлэх төв зохион байгуулсан юм. Хамтарсан тоглолт гурван цагийн турш халуун алга ташилтаар үргэлжилж, Монголын талаас морин хуур, хөөмий, хархираа, уртын дуу, уран нугаралт, ардын бүжиг зэрэг язгуур болон үндэсний урлагийн бүхий л төрлийг багтаасан үзүүлбэрүүдээрээ Тайваний үзэгчдэд маш өндөр сэтгэгдлийг өгч чадсан юм.
МУИС болон Тайваний их сургууль нь 2004 онд хамтын ажиллагаагааны гэрээнд гарын үсэг зурснаас хойш оюутан солилцооны талд нягт холбоотой байж хамтын ажиллагаагаа хөгжүүлж ирсэн билээ. Харин энэ удаагийн оюутны урлагийн тоглолт зохион байгуулсан нь МУИС-ийн оюутнуудын хувьд гадаадын улс оронд үндэсний өв соёлоо сурталчилсан хамгийн анхны соёлын солилцоо байсан төдийгүй хоёр сургуулийн цаашдын хамтын ажиллагаанд шинэлэг уур амьсгалыг бүрдүүлж чадсан сайхан тоглолт боллоо.
Мөн МУИС-ийн баг бүрэлдэхүүн 4 хоногийн турш Тайвань улсын ёс заншил, түүхэн дурсгалт газруудтай танилцаж, Тайваны Их Сургуулийн захирал доктор Si Chen Li өөрийн биеэр хүлээн авч хүндэтгэлийн оройн зоог барьсан юм.
Тоглолтын бүрэлдэхүүнд оролцсон оюутнууд монгол түмнийхээ баялаг арвин өв соёлыг Тайваний оюутан залууст ийнхүү таниулан сурталчилсан нь хоёр сургууль хоорондын хамтын ажиллагаагаар зогсохгүй Монгол Тайваний харилцаанд хувь нэмрээ оруулж буй бахархууштай үйл хэрэг юм.
Оюутан залуустаа урлаг спорт, сурлагын өндөр амжилт хүсье.
