МУИС-ийн Гадаад хэлний сургалтын төвөөс ” Хэл шинжлэл, боловсрол судлал, орчуулгын онол хэрэглээ” сэдэвт эрдэм шинжилгээний бага хурал зохион байгууллаа.
Хэл бол өөрийн гэсэн онол бодрол, судлах аргазүй, баримтлах зарчим, явуулах бодлого, орчуулах эрдэм тэргүүтэнээ өнөөдрийг хүртэл хөгжүүлсээр ирсэн. Сүүлийн жилүүдэд хэлний хөгжил, хэлийг өөрчлөх, шинэчлэх, хүний хэлний эрх, хэл-үндэстэн, хэлний эдийн засаг, хэлний улс төр, нийгмийн хэлний соёл, хэлний хууль эрхзүй, хэлний сургалтын арга барил гэх мэт хэлний чиглэлийг судлах судалгаа ихээхэн идэвхижиж байгаа билээ.
МУИС-ийн Гадаад хэлний сургалтын төв байгуулагдаад удаагүй бөгөөд энэ удаагийн хурал нь зохион байгуулж буй анхны эрдэм шинжилгээний бага хурал юм. Хурлын үеэр дээр дурьдсан асуудлууд хийгээд хэл судлал, гадаад хэлний сургалтын өнөөгийн байдал, хэтийн төлөвийн талаар эрдэмтэн судлаачдын саналыг сонсож зарим нэг асуудлыг хөндөж ярилцсан юм.
Хуралд МУИС-ийн бүрэлдэхүүн сургуулиуд тухайлбал ГХСС, МХСС, ОУХС, Завхан , Орхон болон ХИС, ХААИС, ХСИС гэх мэт олон их дээд сургуулийн судлаач багш нар оролцож сонирхолтой илтгэл тавьж хэлэлцүүллээ. Мөн уг хурлаар хэлэлцсэн илтгэлүүдээ эмхтгэн нийтлүүлсэн байна. Хэлний онол, орчуулга, нэр томьёо, заах аргазүйн чиглэлээр судалгаа шинжилгээний ажил хийдэг багш , мэргэжилтэн, судлаачид болон хэлний салбарын оюутан залуус хэн бүхнийг энэхүү эрдэм шинжилгээний хурлын эмхтгэлтэй танилцаж санал бодлоо хуваалцаарай.
