МУИС-ийн Хууль Зүйн сургуулийн 2012-2013 оны хичээлийн жил Оюутны Эрдэм Шинжилгээний Хурлын Англи хэл дээрх салбар хурал уламжлалт ёсоор 2013 оны 4 дүгээр сарын 30-нд тус сургуулийн Эрдмийн танхимд амжилттай болж өндөрлөлөө. Уг хурал нь мэргэжлийн Англи хэл болон хуулийн нэр томъёоны мэдлэгийг дээшлүүлэх, зөв хэрэглээг хэвшүүлэх, мэргэжлийн орчуулгын дадлыг эзэмшүүлэх улмаар мэргэжлийн Англи хэл сурах оюутнуудын хүсэл эрмэлзлийг дэмжих зорилготой учир тодорхой эрх зүйн сэдвээр англи дээр илтгэл бэлдүүлж хэлэлцүүлдэг онцлогтой юм.
Хуралд ХЗС-ийн нийт оюутнууд хоёр шаттайгаар оролцож илтгэлээ хэлэлцүүлсэн бөгөөд Нэгдүгээр байранд Олон улсын эрх зүйн 3-р ангийн оюутан И.Ариунбаяр, Хоёрдугаар байранд ОУЭЗ-4 ангийн А.Итгэлтөгс ОУЭЗ-2 ангийн М.Мөнхнаран, Гуравдугаар байранд ОУЭЗ-3 ангийн С.Номынбаясгалан болон О.Цолмон нар шалгарч, Тусгай байранд Эрх зүйн-1 ангийн Г.Анударь болон Э.Ариунзул нар шалгарсан юм.
Тус салбар хурлыг Олон улсын эрх зүйн тэнхимээс зохион байгуулдаг уламжлалтай. Энэ жил тус сургуулийн эдүгээ төрийн байгууллага, хувийн компани болон гадаадын хөрөнгө оруулалттай хуулийн компанид хуульч мэргэжлээр ажиллаж буй Олон улсын эрх зүйн ангийг төгсөгчид ивээн тэтгэсэн юм. Ивээн тэтгэгч болох “Эдийн засаг, эрх зүйн зөвлөгөө” компани 1, 2-р байруудад шалгарсан хоёр оюутныг өөрийн байгууллагад цалинтай дадлага хийх урилгаар, мөн Минтер Эллисон Лоерс компани нэг оюутныг цалинтай дадлагажигчаар ажиллах урилгаар урамшуулж, Хүннү Ресурсэс ХХК санхүүгийн дэмжлэг үзүүлж шагналт байруудын урамшууллаа.
