МУИС, ШУС, Нийгмийн Ухааны Салбарын Антропологи-Археологийн тэнхмийн хөтөлбөр сурталчлах өдөрлөг, дадлагын тайлангийн хурал 2014.11.18-нд МУИС-ийн хичээлийн II байранд амжилттай болж өндөрлөлөө. Үйл ажиллагаанд тус тэнхимтэй хамтран ажилладаг байгууллагуудыг төлөөлж ШУА-ийн Археологийн хүрээлэнгийн секторын эрхлэгч доктор Ч.Амартүвшин, Түүхийн хүрээлэнгийн Нийгэм-Соёлын Антропологийн секторын эрдэм шинжилгээний ажилтан доктор, дрофессор Г.Цэрэнханд нар оролцсон юм.
Антропологи-Археологийн салбарт суралцаж буй оюутнуудын үйлдвэрлэлийн дадлага болон 2013-14 онд оролцож ажилласан экспедицийн судалгааны үр дүнг Археологи-Антропологийн хөтөлбөрийн IV ангийн оюутан Б.Баттулга, Н.Отгонтамир, III ангийн оюутан Б.Амгаланбаатар, Ш.Алтансоёмбо нар, Нийгэм-соёлын антропологийн хөтөлбөрийн IV ангийн оюутан С.Мижид, Б.Нямдаваа, III ангийн оюутан Х.Магмарсүрэн нар хэлэлцүүллээ.
Энэ үеэр тус салбарын оюутнуудын оролцож ажилласан судалгааны үр дүнгээ танилцуулсан үзэсгэлэн зохион байгуулж, археологийн олдвор цэвэрлэх, антропологийн хэмжилт хийх үзүүлэн сургалтыг зохион явуулсан.
Мөн ШУ-ны доктор, зөвлөх профессор Д.Түмэн, Доктор, профессор Д.Бум-Очир, доктор, дэд профессор Ц.Цэцэгжаргал нар оюутнуудад шинэчилсэн хөтөлбөрийн талаар лекц уншихын зэрэгцээ, хэрэглэх сурах бичиг, гарын авлагыг оюутнуудад танилцуулж багш нарын бүтээлийн үзэсгэлэнг толилуулсан байна.
Ирэх долоо хоногт МУИС-ийн хичээлийн байруудад тус тэнхмийг танилцуулсан постеруудыг байршуулж, 2014 онд МУИС-д элсэгчдэд танилцуулгыг тараахаар болов.
