МТ-ийн мэргэжлийн шалгалтад МУИС-ийн оюутан хамгийн өндөр оноог авлаа.
МУИС-ийн өндөр босгыг эрдэм, номоороо үеийнхнээ манлайлсан, шилдэг хүүхдүүд даван орж, улс, эх орныхоо хөгжлийн түүчээ болсон үе үеийн эрдэмтэн сэхээтэн, улс төрийн чадварлаг удирдагчид, мэргэжилтнүүдийн залгамж халаа болон төрөн гардгаар бид бахархдаг. Эдгээр оюутнуудын тэргүүн эгнээнд ХШУИС-ийн Мэдээллийн технологийн ангийн 4 дүгээр түвшний оюутан У.Наранбаяр алхдаг юм. Энэ жилийн Мэдээллийн технологийн мэргэжлийн шалгалтад Монгол улсын хэмжээнд хамгийн өндөр оноог авч, Японд болох “Top Gun Training” сургалтад суух эрхээр шагнагдан, аян замын бэлтгэл ажлаа базааж байх үед нь хэсэг хором ярилцлаа.
-Юуны өмнө чамд баяр хүргэж, бахархаж байгаагаа илэрхийлье! МТҮП-аас зохион байгуулдаг МТИШ-ын талаар яриагаа эхэлье.
-Баярлалаа. Монгол дахь мэдээллийн технологийн инженерүүдэд олон улсад хүлээн зөвшөөрөгддөг сертификаттай болох боломжийг энэ шалгалт олгодог. Зохион байгуулалт сайтай, их гоё болдог юм байна. Манай улсын их сургуулийн оюутнууд энэхүү шалгалтад байнга оролцдог. Тэнцэхгүй байсан ч шантралгүй дараа жил нь дахин өгнө. Миний хувьд шалгалтад тэнцэхгүй байж болох ч, маш их мэдлэг, туршлага хуримтлуулдгаараа ач холбогдолтой гэж боддог.
-МТИСШ-ыг ямар зорилгоор өгсөн бэ? Ямар гүйцэтгэлийг үзүүлэв?
-Би 2014 оны аравдугаар сарын 26-ны өдөр зохион байгуулагдсан МТ-ийн инженерийн суурь шалгалтыг өөрийн эзэмшиж байгаа мэргэжлийнхээ дагуу мэдлэгээ сорьж үзэх зорилготой өгсөн. Тус шалгалт нь өглөө болон өдрийн гэсэн 2 хэсгээс бүрддэг бөгөөд, хоёуланд нь тэнцсэн тохиолдолд амжилттай давсанд тооцдог. Миний хувьд нийт 200 онооноос 149-ийг нь авсан.
-Энэ шалгалтын давуу талыг дурдвал? Тэнцсэн тохиолдолд ямар боломжууд та бүхэнд нээгддэг вэ?
-Энэ шалгалтад тэнцсэнээр Азийн 12 оронд хүлээн зөвшөөрөгдсөн сертификат гардан авахаас гадна мэдээллийн технологийн инженер гэдгээ салбарын мэргэжилтнүүддээ баталж, монголд энэ чиглэлээр үйл ажиллагаа явуулдаг салбартаа тэргүүлэгч МТ-ийн компаниудад ажиллах зэрэг олон боломжууд нээгдэж байгаа юм.
-Удахгүй Япон орныг зорихоор зэхэж буй талаар тань сонслоо. Хэдийд, ямар зорилгыг өвөртлөөд байна вэ?
-Япон улсын Мэдээллийн технологийг дэмжих агентлагаас МТ-ийн инженерийн суурь шалгалт болон ахисан түвшний шалгалтуудад хамгийн өндөр оноо авсан хүнийг япон улсад МТ-ийн чиглэлээр үйл ажиллагаа явуулдаг компаниудтай танилцах, туршлага солилцох “Top Gun Training” сургалтад суух эрхээр шагнагдсан юм. Цаашид ийм жишиг тогтох юм байна лээ. Хоёрдугаар сарын сүүлээр явахаар бэлтгэл ажлаа хийж байгаа. Энэ арга хэмжээ нь энэ жил анх удаагаа зохион байгуулагдаж байгаа болохоор их сонирхолтой болох байх аа. Мөн өөрийн орондоо хамгийн өндөр оноо авсан, мэдлэгтэй хүмүүс цугларах учраас тэднээс их зүйл сурах байх гэж бодож байна. Нэмж хэлэхэд, нийт салбарын мэргэжилтнүүддээ болон энэ чиглэлээр сурдаг оюутнууддаа энэ шалгалтыг өгөөд дараагийн япон явах эзэн болоорой гэж хүсмээр байна.
-Олз омогтой, сайн яваад ирээрэй, амжилт хүсье!
