Мэргэжил сонгох хугацаа ойртож байгаатай холбогдуулан МУИС-ийн Бакалаврын I түвшний оюутнууддаа зориулж 2015 оны 4 дүгээр сарын 8-аас 6 дугаар сарын 15-ыг хүртэл долоо хоногт хоёр удаа буюу ЛХАГВА, БААСАН гарагуудад 12.30-13.30 цагийн хооронд МЭРГЭЖЛЭЭ ХЭРХЭН СОНГОХ ВЭ?, ХӨДӨЛМӨРИЙН ЗАХ ЗЭЭЛИЙН ЭРЭЛТ ХЭРЭГЦЭЭ, ИРЭЭДҮЙН ЧИГ ХАНДЛАГЫГ ОЙЛГОХ зэрэг сэдвүүдээрх цуврал уулзалт ярилцлага эхэллээ.
Туршлага, мэдлэг, мэдээллээ хуваалцах хүсэл эрмэлзэлтэй гадаад, дотоодын томоохон их, дээд сургууль төгссөн, салбартаа амжилттай яваа залуусын төлөөллүүд хүрэлцэн ирж хичээлийн их завсарлагаанаар ийнхүү манай оюутнуудтай уулзах юм. Анхны уулзалтад “Мэргэжлээ хэрхэн сонгох вэ?” сэдвээр Америкт төгсөгчдийн холбоо, Удирдах зөвлөлийн Б.Баясал, Монголын залуу манлайлагч хөтөлбөр, төгсөгчдийн сүлжээний гишүүн Г.Төвшин, “Зориг сан”-ийн зөвлөх Б.Амар нар биднийг зорин ирж, сонирхолтой мэдээлэл, чин сэтгэлийн зөвлөгөөг өгөн, санал бодлоо солилцсоноор танхим дахь хүн бүрт санаа, сэдэл төрсөн үр дүнтэй арга хэмжээ боллоо. Оюутан залуус та бүхэн, сургуулиас олгож буй уг ховор завшааныг алдалгүй уулзалт, ярилцлага бүрт хамрагдаарай гэж захья аа.
