МУИС-ийн ШУС-ийн Биологийн тэнхимийн Экологийн хөтөлбөрийн хамт олон Монголын экологийн нийгэмлэгтэй хамтран экологийн судалгааны цуврал семинар, сургалтыг зохион байгуулж ирсэн уламжлалтай билээ. Үйл ажиллагаанд экологи-эволюцийн биологийн чиглэлийн тэргүүлэх эрдэмтэн, судлаачдыг гадаадаас урин оролцуулах бөгөөд энэ удаагийн судалгааны семинарт АНУ-ын Луисвиллийн Их Сургуулийн тэргүүлэх профессор д-р. Ли Алан Дугаткин “Ген, соёл, үржлийн хосын сонголт” сэдвээр нээлттэй судалгааны семинар хэлэлцүүлж, мөн “Зан төрхийн экологийн 20 цагийн хичээл”-ийг 2015 оны 4 дүгээр сарын 27-ноос 29-ний хооронд удирдан явууллаа.
Семинараар д-р. Ли Алан Дугаткин организмын зан төрхийн шийдэлд генетик мэдээлэл болон орчны (соёлын) мэдээлэл хэрхэн нөлөөлдөг талаар өөрийн судалгааны үр дүнгээс хэлэлцүүлсэн бол “Зан төрхийн экологи” хичээлээр тухайн шинжлэх ухааны салбарын хамгийн үндсэн асуудлуудыг танилцуулсан нь сургалтад оролцогсдод ихээхэн сонирхолтой байлаа. МУИС-ийн Биологийн тэнхим, МУИС-ийн Экологийн боловсрол төв, ХААИС, МУБИС, ШУА-ийн Ерөнхий болон Сорилын Биологийн хүрээлэн, Зэрлэг амьтан судлах хамгаалах төв, Оюу толгой ХХК, Хустай БЦГ, Талын түүчээ ТББ, Монполимет ХХК зэрэг экологи, байгаль орчны чиглэлээр үйл ажиллагаа явуулдаг байгууллагуудын төлөөлөл уг сургалтад оролцсон нь төлөөлөл, хамрах хүрээ өргөнтэй, манай улсад харьцангуй бага хөгжсөн зан төрхийн экологийн салбарыг сонирхох мэргэжлийн хүрээнээ сонирхлыг нэмэгдүүлсэн ач холбогдолтой үйл ажиллагаа боллоо.
Тэргүүлэх профессор Д-р. Ли Алан Дугаткиний судалгааны семинар, сургалттай холбоотой бүх зардлыг гаргасан Тэйлорын гэр бүл-Азийн сангийн нэрэмжит экологи, байгаль хамгааллын эндаумэнт сан, сургалтын хугацаанд орчуулга хийсэн МУИС-ийн Биологийн тэнхимийн багш, д-р. Л.Ариунцэцэг, МУБИС-ийн Биологийн тэнхимийн багш, д-р. Я.Оюунчулуун, Даян Дэлхийн Ногоон Өсөлтийн Санаачилга олон улсын байгууллагын мэргэжилтэн, д-р. Ш.Анармаа нарт гүн талархал илэрхийлье.
МУИС-ийн ШУС-ийн Биологийн тэнхим
Экологийн хөтөлбөрийн хамт олон
