Рио Тинто компани өнөөдөр МУИС-ийн багш оюутнуудад зориулан нээлттэй өдөрлөг зохион байгууллаа. Өдөрлөгт МУИС-ийн Эдийн засаг, хөгжлийн бодлогын асуудал эрхэлсэн дэд захирал Б.Даваасүрэн, ФЭС-ийн захирал Ж.Даваасамбуу, “Байгаль эх- лицей” ахлах сургууль, Экологийн боловсролын төвийн захирал Ц.Батчулуун болон ББС, ГГС, ХХИС-ийн багш оюутнууд мөн Рио Тинто компанийн олон талт хамтын ажиллагааны хэлтсийн менежер Никол Гагстеттер, Байгаль орчны менежер Ж.Сувд, Орон нутгийн хөгжил, тогтвортой харилцааны хэлтсийн менежер Г.Сугар, Дотоодын ханган нийлүүлэлтийн хөгжлийн хэлтсийн мэргэжилтэн Т.Энхцэцэг нар оролцсон юм.
Өнгөрсөн оны 11 сард байгуулсан хамтын ажиллагааныхаа хүрээнд төлөвлөж зөвшилцсөн ажлынхаа дагуу гол гол салбаруудынхаа танилцуулгыг багш оюутнуудад хүргэх зорилготой энэхүү үйл ажиллагаа нь цувралаар МУИС-ийн бүх салбар сургуулийг хамрах юм байна. Өдөрлөгийн үеэр тус компанийн тэргүүлэх технологи, хөгжлийн бодлого, байгаль орчныг хамгаалах бодлого, стандарт Оюу толгой төсөлд хэрхэн хэрэгжиж буй, Өмнөговь аймгийн нутгийн иргэдийг дэмжих, хөгжлийн талаар танилцуулж, багш оюутнуудтай яриа өрнүүлсэн юм.
