Монгол Улсын Их Сургуулийн Оюутны хөгжил, үйлчилгээний газраас “Сүрьеэтэй тэмцэх дэлхийн өдөр”-ийн хүрээнд АШУҮИС, МНI, Солонгосын үндэсний сүрьеэгийн нийгэмлэг, төлөөлөгчийн газартай хамтран өдөрлөг зохион байгууллаа.
Өдөрлөгөөр “Бид нэг агаартай” баримтат кино үзүүлэх, флаш моб бүжгийн үзүүлбэр үзүүлэх, ханын самбарын уралдаан зохион байгуулах, “АХА” асуулт хариултын тэмцээн зохион байгуулах, витаминжуулалт хийх зэрэг ажлыг сайн дурын ажилтнууд буюу МУИС-ийн оюутнуудын хамтаар зохион байгуулав.. Түүнчлэн цээжний рентген шинжилгээг явуулын рентген аппаратаар авах явуулын автобусыг гадаа талбайд байрлуулан ханиалгах зовиуртай 50 оюутныг шинжилгээнд хамруулсан юм.
Харвардын эрдэм шинжилгээ, судалгааны нэгж MHI байгууллагын судлаач, АШУҮИС-ийн багш Ж.Бадамцэцэгээс үйл ажиллагааны талаар тодрууллаа.
“Сүрьеэгийн халдвараас урьдчилан сэргийлэхэд Д аминдэмийн нөлөө” гэсэн дэлхийн хэмжээний клиникийн судалгаа явуулж байна. Энэ судалгаанд 10.000 гаруй хүүхдийг хамруулсан. Эдгээр хүүхдүүдэд шинжилгээ хийж үзэхэд сүрьеэгийн далд халдвар маш өндөр буюу 10 хувьд нь халдвар илэрсэн. Үүнтэй холбогдуулан оюутан залууст энэ өвчний талаар мэдээлэл өгөх, урьдчилан сэргийлэх үйл ажиллагааг зохион байгууллаа. 2030 он гэхэд Улаанбаатар хотыг сүрьеэгүй дэлхийн жишиг хот болгохоор зорин ажиллаж байна.
