Европын Холбооны санхүүжилтээр хэрэгжиж буй ТАСТIC төслийн хүрээнд “PRINCE-2” сертификат олгох сургалт 2018 оны 4 дүгээр сарын 23-27-ны өдрүүдэд МУИС-ийн Номын сангийн 202 тоотод явагдах юм.
TACTIC (Through Academic Cooperation Towards Innovative Capacity) төсөл нь 2015 оноос хэрэгжиж эхэлсэн бөгөөд 2018 он хүртэл үргэлжилнэ. Энэхүү төсөл нь Монгол, Вьетнам, Камбожийн их, дээд сургуулиудын менежментийг Европын Холбооны стандартын дагуу сайжруулахад чиглэсэн бөгөөд төслийн зохицуулагчаар БНЧУ-ын Мазарикийн их сургууль, хамтран зохицуулагчаар МУИС ажилладаг юм. http://tactic.muni.cz
Төслийн хүрээнд 2017 онд хүний нөөц, санхүүгийн менежмент, мэдээллийн технологи болон оюутан элсэлт гэсэн чиглэлээр Европын экспэртүүд ирж МУИС болон Хүмүүнлэгийн их сургууль дээр 3-4 хоногийн сургалт явуулсан бөгөөд сургалтад хамрагдсан МУИС-ийн болон Хүмүүнлэгийн их сургуулийн багш, мэргэжилтнүүд Европын 3 орны 4 их дээд сургуулиудад (Эстоны Таллины технологийн их сургууль, БНФУ-ын Перпинян их сургууль, БНЧУ-ын Мазарикийн их сургууль болон Брногийн технологийн их сургууль) өнгөрсөн оны 11 дүгээр сард чиглэл бүрээр сургалтад хамрагдсан.
