МУИС–ийг 2024 он хүртэл хөгжүүлэх стратегийн төлөвлөгөөнд МУИС-ийн хамт олны гишүүн бүр дагаж мөрдөн эрхэмлэх, МУИС –ийн үнэт зүйлсийг тодорхойлохдоо “… академик эрх чөлөөг дээдэлсэн, сургах, суралцах эрдэм мэдлэгийн хүрээг тэлэх, бүтээлч сэдэл хандлагыг дэмжин хөгжүүлэх жишгийг тодорхойлсон, багш судлаач, оюутны болон хувь хүний ёс зүйг дээдлэн, үнэнч шударга байж,бусдад хүндэтгэлтэй хандаж, үндэсний болон нийтийн сайн сайхны төлөө зүтгэх итгэл үнэмшилт бүхий манлайлагч байж, нийгэмд эерэг өөрчлөлтийг бий болгох, хүний мэдлэг, ур чадвар, бүтээлч байдал, шинэ санааг үнэлэн хөхүүлэн дэмжиж урамшуулах…“ байна гэжээ.
Монгол Улсын Их Сургуулийн оюутныг нийтийн үнэт зүйлийг дээдэлсэн, хувь хүний ёс суртахуун, хүнлэг чанар, зөв хандага төлөвшилтэй манлайлагч иргэн болгох зорилгоор ОХҮГ нь нийт суралцагчдын дунд “МУИС –ийн СОЁЛ” хөтөлбөрийг хэрэгжүүлэхээр боллоо. МУИС –ийн оюутан нь аливаад (М) МАНЛАЙЛАГЧ, (У) УДИРДАН ЧИГЛҮҮЛЭГЧ байж эрдмийг түүчээлж (И) ИННОВАТОР, (С) СУДЛААЧ байна гэсэн эрхэм зорилтыг нийт оюутнуудад уриалга болгож байна.
ОХҮГ нь дэвшүүлсэн зорилтын хүрээнд ХБНГУ-н Ахмад Мэргэжилтний Байгууллагын (SES) гишүүн Бремений Их Сургууль, Якобсын Их Сургуулийн багш доктор Клаас Диетер Кнүүпийг 2018 оны 4 дүгээр сарын 27 – 5 дугаар сарын 18 хүртэл / 3 долоо хоног / МУИС-д зочин профессороор урьж оюутныг нийгмийн хариуцлагатай, соёлтой, төлөвшилтэй иргэн болж төгсөхөд дэмжих үүднээс лекц, сургалтыг зохион байгуулахаар болсон бөгөөд энэ сургалтаар дамжуулан МЕНТОР оюутнуудыг бэлдэх зорилготой юм.
Доктор Клаас Диетер Кнүүп нь 4 дүгээр сарын 30, 5 дугаар сарын 2-ны өдрүүдэд ОУХНУС-ын оюутнуудад “Дипломат ёслол”, “Европын холбоo-Олон улсын харилцааны системд” зэрэг лекцүүдийг амжилттай уншиж өндөрлөлөө. Тус 2 өдрийн лекцэнд нийт 200 гаруй оюутан 4 багш оролцлоо. Доктор Клаас Диетер Кнүүпийг 4 дүгээр сарын 30-нд ОХҮГ –ийн дарга доктор Б.Алтангэрл хүлээн авч уулзаж найрсаг яриа өрнүүлсэн бөгөөд өнөөдөр буюу 5 дугаар сарын 2-ны өдөр Сургалт, оюутан эрхэлсэн дэд захирал профессор Б.Очирхуягтай уулзаж элэгсэг яриа өрнүүлж цаашдын хамтын ажиллагааны талаар санал солилцлоо.
МУИС –ийн оюутнууд Та бүхнийг зочин профессорын сонирхолтой лекц, уулзалтанд оролцохыг урьж байна.
ОЮУТНЫ ХӨГЖИЛ, ҮЙЛЧИЛГЭЭНИЙ ГАЗАР
