МУИС-д Өвөр Монголын Багшийн Их Сургуулийн захирал Др.Юн Гуохон, Гадаад харилцаа хариуцсан дэд захирал Др.Ялалт нар 2018 оны 9 дүгээр сарын 19-ний өдөр айлчиллаа. Зочдыг захирлын үүрэг гүйцэтгэгч Др. Я.Төмөрбаатар, Эрдэм шинжилгээ, хамтын ажиллагаа хариуцсан дэд захирал Др. Б.Очирхуяг, ШУС-ийн БУС-ын Газарзүйн тэнхимийн эрхлэгч Др. В.Батцэнгэл, Хамтын ажиллагааны хэлтсийн дарга Ш.Мэндбаяр нар хүлээн авч уулзлаа.
Уулзалтаар хоёр сургуулийн хооронд урд хэрэгжүүлж ирсэн хамтын ажиллагааны талаар ярилцаж, чиглэл, салбарыг өргөжүүлэн, урлаг, спортын арга хэмжээ хамтран зохион байгуулах уламжлал бий болгохоос гадна кампус төсөл хэрэгжүүлэх, хамтарсан лаборатор, лицей сургууль байгуулах, байгалийн шинжлэх ухааны чиглэлээр хамтарсан их сургууль байгуулах боломжийн талаар санал солилцож, энэ ажлыг хэрэгжүүлэхэд шаардлагатай эрхзүйн орчны талаар судалгаа хийхээр харилцан тохиролцлоо.
Мөн хоёр сургуулийн хооронд 2008, 2011 онуудад байгуулсан хамтын ажиллагааны гэрээг шинэчилэн талууд гарын үсэг зурлаа. Энэхүү гэрээнд гарын үсэг зурснаар хоёр сургуулийн урд нь явуулж ирсэн болон одоо явуулж байгаа хамтын ажиллагаа батжиж, оюутан суралцуулах боломж өргөжиж тодорхой чиглэлүүдээр 2+2 хөтөлбөр хэрэгжих бололцоо бүрдэж буй юм.
Өнөөгийн байдлаар эрдэм шинжилгээ, сургалтын чиглэлээр МУИС болон ӨМБИС-ийн зарим бүрэлдэхүүн сургууль, салбар, тухайлбал МУИС-ийн Газарзүй, Физик, Биологи, Түүх болон Нийгмийн ухааны салбарын багш судлаачид хамтарсан судалгааны төсөл хэрэгжүүлэх, хамтарсан судалгааны бүтээл хэвлүүлэх, багш оюутан солилцох, эрдэм шинжилгээний хурал зохион байгуулах зэрэг чиглэлээр хамтарч ажиллаж байна.
ӨМБИС нь 1952 онд байгуулагдсан Өвөр Монголын Өөртөө Засах Орны тэргүүлэх их сургуулиудын нэг юм. ӨМБИС захиргааны 22 нэгж, 29 бүрэлдхүүн коллеж, нэг бие даасан коллеж, сургалт судалгааны хоёр хэлтэстэй. Нийтдээ 1900 ажилтантай. Үүний 1300 нь багш тэдгээрийн 70 хувь нь докторын болон магистрийн зэрэгтэй. Тус их сургуулийн нийт багш нарын 45 хувь нь профессорын зэрэглэлд ажилладаг ба тэдгээрээс 700 гаруй багш доктор, магистрийн хөтөлбөрт хичээл заах, судалгааны ажил удирдах эрхтэй байдаг байна.
2017 оны байдлаар 24000 оюутан бакалаврын түвшинд, 4200 гаруй оюутан төгсөлтийн дараах сургалтанд суралцаж байна. Мөн гадаад улс орнуудаас 200 гаруй оюутнууд суралцдаг. ӨМБИС-д бакалаврын 79 хөтөлбөр, мэргэжлийн магистрын 10, шинжлэх ухааны магистрын 155, докторын 7 хөтөлбөр хэрэгжиж байна.
Одоогоор тус сургууль 10 гаруй эрдэм шинжилгээ судалгааны хүрээлэн, төв болон улсын хэмжээний судалгааны лабораториудтай бөгөөд эрдэм шинжилгээ судалгааныхаа зарим салбараар өөртөө засах орон болон улсынхаа хэмжээнд тэргүүлдэг их сургууль юм.
Хамтын ажиллагааны хэлтэс
