2018 оны 10 дугаар сарын 22-нд Япон Улсын Нагояагийн их сургуулийн захирал Мацуо Сэичи тэргүүтэй төлөөлөгчид МУИС-д зочиллоо. Төлөөлөгчдийн бүрэлдэхүүнд Азийн сателит кампус хариуцсан дэд захирал, профессор Исода Фумио, Азийн сателит кампусийн мэргэжилтэн Ватанабе Саюри, Боловсрол судлал, хүний хөгжлийн ахисан түвшний сургуулийн профессор Нагата Мазако, Боловсрол судлал, хүний хөгжлийн ахисан түвшний сургуулийн захирал Уэдо Такэо, Боловсрол судлал, хүний хөгжлийн ахисан түвшний сургуулийн профессор Отани Такаши, Хуулийн ахисан түвшний сургуулийн профессор Мизушима Томонори, Боловсрол судлал, хүний хөгжлийн ахисан түвшний сургуулийн профессор Шибата Ешиаки нар байлаа.
Зочдыг МУИС-ийн захирлын үүрэг гүйцэтгэгч, Др. Я.Төмөрбаатар, Сургалт, оюутан хариуцсан дэд захирал, Др. Б.Очирхуяг, Эрдэм шинжилгээ, хамтын ажиллагаа хариуцсан дэд захирал, Др. Б.Очирхуяг, Хамтын ажиллагааны хэлтсийн дарга Ш.Мэндбаяр, Хамтын ажиллагааны хэлтсийн мэргэжилтэн Т.Сая-Эрдэнэ, Хууль зүйн сургуулийн дэд профессор, Азийн сателит кампус хүрээлэнгийн Монголын салбарын захирал Д.Гангабаатар, хөтөлбөрийн зааварлагч Яширо Маюуми болон ажилтан Э.Тодрол нар хүлээн авч уулзсан юм.
Уулзалтын үеэр хоёр тал сүүлийн үеийн мэдээллээ солилцож, урд хийгдсэн хамтын ажиллагааны үр дүнгийн талаар ярилцан, цаашид хийх ажлуудаа зөвлөлдлөө. Захирлын үүрэг гүйцэтгэгч Я.Төмөрбаатар МУИС-ийг 2024 он гэхэд Азийн шилдэг 100 сургуульд багтаах зорилгод хүрэхийн тулд гаргасан судалгааны их сургууль болгох төлөвлөгөө, Ахисан түвшний сургууль байгуулах талаар ажиллаж буй талаараа танилцуулж, Нагояагийн их сургууль, Ахисан түвшний сургуулиудтай хамтарч ажиллах, туршлага судлах, багш нар, удирдлагын ажилтан, мэргэжилтний солилцоо явуулах, тодорхой чиглэлүүдээр 5-10 жилийн нарийвчилсан төлөвлөгөө гарган хөтөлбөр боловсруулан хэрэгжүүлэх, үүнтэй холбоотойгоор хоёр сургуулийн хооронд байгуулсан гэрээнд нэмэлт, өөрчлөлт оруулах, Японы хамтын ажиллагааны олон улсын байгууллагатай хамтарсан төсөл боловсруулан хэрэгжүүлэх зэрэг ажлыг хийх санал гаргав.
Нагояагийн их сургуулийн захирал Мацуо Сэичи болон бусад төлөөлөгчид МУИС-ийн саналыг хүлээн авч хамтран ажиллах нь нэр төрийн хэрэг байх болно гээд судалгааны их сургууль болохын тулд нэн тэргүүнд анхаарал хандуулан ажиллах салбар, чиглэл дээр хамтран ажиллах боломжтой тул ахисан түвшний сургууль байгуулах төлөвлөгөө, оюутны талаар баримтлах бодлогын талаар мэдээллээ ирүүлэхийг хүсэв.
Мөн энэ өдөр МУИС дээр нээлтээ хийж буй Нагояагийн их сургуулийн Азийн сателит кампус хүрээлэнгийн Монгол дахь салбараас хэрэгжүүлэх хөтөлбөрийн талаар танилцуулж монгол оюутнууд тус сургуульд магистраас гадна докторын түвшинд суралцах, урд нь зөвхөн англи хэл дээр байсан хөтөлбөрүүдэд япон хэлээр суралцах боломж нээгдэж байгаа талаар танилцууллаа.
