2019 оны 5 дугаар сарын 25-ны өдөр БНСУ-ын парламентын гишүүн хатагтай Ким Ён Жу тэргүүтэй төлөөлөгчид МУИС-д айлчиллаа. Хатагтай Ким Ён Жу-г дагалдаж Чанвон дээд сургуулийн профессор Мин Гын Ги, түүний зөвлөхүүд болох Жу Тэ Сан, Жу Тэ Гын, туслах Хуан Жон Хы, Сөүл хотын Иргэдийн төлөөлөгчдийн гишүүд Чой Үн Шиг, Ким Жон Тэ нар байлцав.
МУИС-ийн талаас зочдыг Санхүү, төлөвлөлт хариуцсан дэд захирал Др. Ч.Ундрам, Эрдэм шинжилгээний хэлтсийн дарга Др. А.Баярбаатар, Бизнесийн сургуулийн Менежментийн тэнхимийн эрхлэгч Др. Д.Энх-Отгон болон Хамтын ажиллагааны хэлтсийн дарга Ш.Мэндбаяр нар хүлээн авч уулзав.
Уулзалтын эхэнд Др. Ч.Ундрам зочдыг хүрэлцэн ирсэнд талархал илэрхийлээд эрхэм гишүүнд Монгол Улсын Засгийн газраас Солонгос Монгол хоёр орны харилцааг бэхжүүлж өргөжүүлсэн алдар гавьяаг нь үнэлж “Алтан гадас” одонгоор шагнуулж буйд нь баяр хүргэв. Тэрээр үргэлжлүүлэн МУИС болон БНСУ-ын их, дээд сургуулиуд болон эрдэм шинжилгээний байгууллагатай хэрэгжүүлж буй хамтын ажиллагааны талаар тодорхой мэдээлэл өгөв.
Хатагтай Ким Ён Жу хүлээн авч буйд нь Др. Ч.Ундрам тэргүүтэй МУИС-ийн төлөөлөгчдөд хариу талархал илэрхийлээд 2013 оноос эхлэн Монгол Улсын Их хурлын гишүүдтэй хамтран ажиллаж буйгаа дурдав. Тэрээр парламентын гишүүнээр 3 дахь удаагаа сонгогдон ажиллаж буй туршлагатай улс төрч бөгөөд БНСУ-ын Хөдөлмөр эрхлэлт, хөдөлмөрийн яамны анхны эмэгтэй сайдаар томилогдон ажиллаж байжээ. Эрхэм гишүүн Ким Ён Жу эмэгтэйчүүдийн оролцоог улс төрийн талбарт нэмэгдүүлэх, тэдний манлайллыг нэмэгдүүлэхтэй холбоотой хэд хэдэн сургалтыг Монгол Улсад явуулж байсан тухайгаа уулзалтын үеэр онцлов.
Уулзалтын үеэр дэд захирал Др. Ч.Ундрам эрхэм гишүүнийг МУИС-д дахин айлчилж багш, оюутнуудад зориулсан лекц унших болон БНСУ-д бизнес эрхлэхтэй холбоотой эрх зүйн орчны талаар сургалт явуулах боломжийг судалж үзэхийг хүсэв. Хатагтай Ким Ён Жу саналыг талархан хүлээж аваад МУИС-д айлчлах боломжит хугацааг судалж хариу ирүүлэхээ мэдэгдэв. БНСУ-ын парламентын гишүүн хатагтай Ким Ён Жу залуусын улс төрийн талаарх хандлагыг эерэгээр өөрчлөх зорилгоор БНСУ-ын их, дээд сургуулиудад уригдан лекц уншдаг тухайгаа дурдаад цаашид хоёр улсын хоорондын боловсрол, соёлын харилцааг дэмжин ажиллаж тодорхой үр дүн гаргахад багагүй хугацаа шаардлагатайг онцлоод хоёр улсын хамтын ажиллагааг хөгжүүлэхэд өөрийн хувь нэмрийг оруулж ажиллахад бэлэн гэдгээ уулзалтын төгсгөлд илэрхийлэв.
