МУИС-ийн Удирдах зөвлөл дэх багшийн төлөөллийг сонгох сонгуулийн II үе шат буюу бүрэлдэхүүн/салбар сургуулиас хамгийн олон санал авсан нэр дэвшигчдээс Удирдах зөвлөлд сонгогдох 3 нэр дэвшигчдэд санал өгөх үйл ажиллагааг 2019 оны 12 дугаар сарын 20-ны өдөр 08.00-16.00 цагийн хооронд зохион байгууллаа. Удирдамжид заасны дагуу санал хураалтыг 16.00 цагт хааж саналыг тоолов. 16.00 цагийн байдлаар санал хураалтын ирц 81.7 хувь байлаа.
Удирдах зөвлөл дэх багшийн төлөөллийг сонгох сонгуулийн санал өгөх жагсаалтад бүртгэгдсэн 521 багшаас 426 багш санал хураалтад оролцов. Саналын хайрцагнаас 426 саналын хуудас гарч ирснээс 404 хүчинтэй саналын хуудас, 22 хүчингүй саналын хуудас байв. Түүнчлэн МУИС-ийн Эрдэнэт сургуулийн 27 багш, Завхан сургуулийн 13 багшийн саналын мэдээг тухайн сургууль дээр байгуулагдсан тооллогын комиссын тогтоол хэлбэрээр хүлээн авсан болно.
Санал хураалтын дүнгээр МУИС-ийн ШУС-ийн ХУС-ын Ази судлалын тэнхимийн дэд профессор Д.Бадмаанямбуу 177 санал /39.9 хувь/, МУИС-ийн ШУС-ийн БУС-ын Математикийн тэнхимийн дэд профессор А.Амарзаяа 171 санал /38.5 хувь/, МУИС-ийн ШУС-ийн БУС-ын Биологийн тэнхимийн профессор Б.Батжаргал 147 санал /33.1 хувь/ буюу хамгийн өндөр санал авсан гурван нэр дэвшигч болсон тул Ажлын хэсэг эдгээр нэр дэвшигчдийг УЗ-д уламжиллаа.
