МУИС-ийн 70 жилийн ойд зориулсан ” Тогтвортой хөгжлийн чиг хандлага, хэрэгжүүлэх арга зам” сэдэвт олон улсын эрдэм шинжилгээний хурал 10 дугаар сарын 04-ний өдөр Төрийн ордны их танхимд боллоо. Хурлыг нээж МУИС-ийн захирал С.Төмөр-Очир, Байгаль орчин, ногоон хөгжлийн яамны сайд С.Оюун, Азийн хөгжлийн банкны тогтвортой хөгжил, мэдлэгийн менежмент хариуцсан дэд ерөнийлөгч Bindu Lohani нар үг хэлсэн юм.
Хурлаар тогтвортой хөгжил дэх дээд боловсролын үүрэг, Ази-Номхон далайн бүс нутгийн ирээдүйн тогвортой хөгжил, инноваци тогтвортой хөгжлийг жолоодож чадах уу?, тогтвортой хөгжил дэх ногоон эдийн засаг гэсэн 4 салбар хуралдаанаар Орос, Англи, Хятад, Польш, Япон, Солонгос, Унгар, Африк, Герман зэрэг олон орны эрдэмтэд илтгэл тавьж, санал бодлоо солилцлоо.
Орон орны тэргүүлэх их сургуулиуд, олон улсын байгууллага, нийгэм-эдийн засгийн зүтгэлтэн, бизнесмен зэрэг 50 гаруй хүндэт зочид уригдан ирж оролцсон явдал нь тус хурлын олон улсын түвшин дэх цар хүрээг илэрхийлж байв. Мөн Монгол Улсын Засгийн Газар, төрийн яам, агентлагууд, их сургууль, эрдэм шинжилгээний байгууллага, хувийн болон олон нийтийн байгууллагын 700 гаруй төлөөлөгчид оролцсон юм.
Энэхүү олон улсын хурлын гол ач холбогдол нь Монгол Улсын эдийн засгийн өсөлт нь уул уурхайн салбараас хэт хамаарсан улмаар экосистемын үйлчилгээг доройтуулж байгаа хөгжлийн замаа эргэн харж дүгнэх, цаашид бүс нутгийн болон дэлхий нийтийн даяаршлалтай уялдуулан Монгол улсын нийгмийн тогтвортой хөгжлийн хандлага, үзэл баримтлалыг шинээр тодорхойлоход томоохон боломжийг бидэнд олгоход оршиж байгаа юм” хэмээн зохион байгуулагчид нь хэлсэн юм.
Хурлаар хэлэлцэгдсэн илтгэл, оролцогчдын санал бодлоос өнөөдөр монгол улсад орчин үеийн шинжлэх ухаан, технологи, инновацийн ололт амжилтад тулгуурласан нийгэм-эдийн засаг-байгаль орчин гэсэн гурван талт шүтэлцээг судлаж, төр засгийн болон бүс нутгийн хөгжлийн бодлоготой нягт уялдуулан, улмаар дэлхийн нийтийн тогтвортой хөгжлийн чиг хандлагатай нийцүүлэн, Монгол улсын дунд болон урт хугацааны хөгжлийн суурь тулгамдсан асуудлуудыг судалгааны үндэслэлтэйгээр зөв тодорхойлон гаргах нь зайлшгүй хийх ёстой асуудлуудын нэг болсон байна гэдэг нь харагдаж байлаа. Тиймээс ч Монгол Улсын тогтвортой хөгжлийн стратеги бодлого, хэрэгжүүлэх цогц арга замыг төлөвшүүлэх, монгол хүний мэдлэгт суурилсан оюуныг дээдлэн хөгжүүлэхэд их сургуулиуд тэргүүн эгнээнд байж ажиллах нь маш чухал гэдэгтэй гадаад болон дотоодын бүхий л эрдэмтэд санал нэгдэж байв.
Энэхүү хурлыг МУИС-н дэргэдэх Тогтвортой Хөгжлийн Хүрээлэн санаачлан Азийн хөгжлийн банкны санхүүжилттэйгээр зохион байгуулсан юм.
