Чойжавын Лувсанжав 1930 оны 12 сарын 16-нд Сайн ноён хан аймгийн Илдэн бэйлийн хошуу, одоогийн Өвөрхангай аймгийн Өлзийт суманд төржээ. 1940 оноос бага сургуульд орж, улмаар 1949-1953 онд УБДС-ийн тооны анги дүүргэн, 1954-1960 онд Бээжингийн их сургуульд сурч төгсжээ. 1947-1950 онд сумын бага сургууль, 1953-1954 онд Хужирт сумын сургуульд багш, захирал, 1960-1961 онд ГЯЯ-нд референт, 1961-1977, 1981-1989, 1992-1993 онд МУИС-д багш, тэнхимийн эрхлэгч, декан, 1977-1980 онд Чехословак Улсын Карлын их сургуульд, 1989-1992 онд Япон Улсын Токио хотын Гадаад хэлний их сургуульд монгол хэл бичиг, угсаатны судлалын багшаар уригдан ажиллаж байлаа. 1966 онд “Монгол хэлний өвөрмөц хэллэг” сэдвээр Унгар Улсад дэд эрдэмтний зэрэг, 1972 онд “Англи-монгол хэлний харьцуулсан хэлзүй” сэдвээр ЗХУ-д докторын зэрэг хамгаалжээ.
Чой.Лувсанжав багш МУИС-д ажилласан 37 жилийн хугацаанд англи, хятад, япон, герман, франц, солонгос хэлийг заан сургахад анхааран ажиллаж, МУИС-ийн Гадаад хэлний тэнхим, Дорно дахины хэлний тэнхимийг хариуцан ажиллаж байв. Дотоод, гадаадын 40 гаруй эрдэмтний эрдэм шинжилгээний ажлын удирдагчаар ажиллаж, англи, орос, хятад, япон, франц, герман, манж, төвөд, латин, чех, мажар зэрэг арав гаруй хэлийг эзэмшин, эрдмийн судалгаандаа хэрэглэж байсан юм. Эрдэм шинжилгээний 300 гаруй өгүүлэл бичиж, 40 гаруй ном, сурах бичиг, толь бичгийг зохион хэвлүүлжээ. Монгол бичгийг сэргээн, төрийн бичиг болгох их үйл хэрэгт хүчин зүтгэж, монгол хэл бичиг, гадаад хэлний боловсролтой олон зуун шавь нарыг Монгол Улсад бэлдэхэд үнэтэй хувь нэмрээ оруулсан тул Монгол Улсын төрөөс 1993 онд профессор Чой.Лувсанжавт Монгол Улсын Гавьяат Багш, МУИС-ийн хүндэт профессор цол хүртээжээ. Мөн 1971 онд Чехословак Улсын Прагийн Их сургуулийн хүндэт профессор цол хүртэж байсан юм.
Чой.Лувсанжав багш ШУА-ийн Эрдмийн Зөвлөлийн гишүүн, Эрдмийн цол зэрэг хамгаалуулах зөвлөлийн гишүүн, Улсын Нэр Томьёоны комиссын гишүүн, Монгол Улсын Ерөнхийлөгчийн дэргэдэх Эрдэмтдийн зөвлөлийн гишүүн, МУИС-ийн Эрдмийн Зөвлөлийн гишүүн байв.
Чой.Лувсанжав багшийн олон шавь нар, шавийн шавь нар эдүгээ МУИС-ийн гадаад хэлний салбарт ажиллаж, багшийнхаа үйлсийг залгамжлан ажиллаж байгаа бөгөөд эрхэм хүндэт сайхан багшийнхаа их ачийг санан дурссаар байдаг юм.
МУИС-ийн ШУС-ийн ХУС-ын
Ази Судлалын Тэнхим
Европ Судлалын Тэнхим
Их Британи, Америк Судлалын Тэнхим
Монгол хэл, хэл шинжлэлийн тэнхим
