МУИС, Японы Тохо их сургууль хооронд хамтын ажиллагааны гэрээнд гарын үсэг зурах ёслолын арга хэмжээ 10-р сарын 31-нд боллоо. Тус арга хэмжээнд Тохо их сургуулиас захирал, профессор Яамазаки Жүничи, Эмзүйн факультетийн захирал, профессор Като Фүмио болон профессор Анзай Ёожиро нар, харин МУИС-иас захирал С.Төмөр-Очир, ГХХА эрхэлсэн дэд захирал А.Галтбаяр, ББС-ийн захирал Н.Батхүү, ББС-ийн багш Ж.Батхүү болон ГХХАХ-ийн ажилтнууд оролцсон юм.
Гэрээнд гарын үсэг зурж хамтын ажиллагаагаа өргөжүүлэн хөгжүүлснээр:
– Тодорхой салбаруудын судалгаа, шинжилгээний ажлыг дэмжих,
– Зөвхөн биологийн бус байгалийн шинжлэх ухааны бусад салбарт багш, ажилчид болон оюутнуудад солилцооны хөтөлбөрт хамрагдах боломж олгох,
– Хамтарсан сургалтын хөтөлбөр, төсөл хэрэгжүүлэх бүрэн боломжтой болно хэмээн хоёр тал гэрээнд гарын үсэг зурах арга хэмжээний үеэр илэрхийллээ.
2007 оноос хойш Тохо их сургуулийн Эм зүйн факультет МУИС-ийн Биологи биотехнологийн сургуультай гэрээтэй ажиллаж байгаа билээ. Энэ хугацаанд манайхаас 2 оюутан тус бүр 1 жилээр судалгаа хийж дараагийн шатны сургалтанд дэвшин суралцаж байна. Монгол, Япон хоёр талын хамтын судалгаа, харилцан айлчлал тогтмол болдог бөгөөд 2010 онд захирал С.Төмөр-Очир, дэд захирал А.Галтбаяр, Ж.Батхүү нар Тохо их сургуульд айлчилж байсан юм.
