МУИС-ийн стратегийн төлөвлөгөөнд туссан “дэлхийн шилдэг их, дээд сургуулиудтай хамтран ажиллах” зорилтын хүрээнд гадаад хамтын ажиллагааг өргөжүүлж Латви Улсын Рига техникийн их сургуультай хамтран ажиллах гэрээ шинээр байгууллаа.
Рига техникийн их сургууль (Rīgas Tehniskā universitāte, https://www.rtu.lv/en) нь 1862 онд байгуулагдсан техник, технологи, инженерчлэл, хэрэглээний шинжлэх ухаан болон бизнесийн чиглэлээр бакалавр, магистр, докторын түвшний хөтөлбөрүүд хэрэгжүүлдэг, QS EECA 2022 их сургуулиудын эрэмбээр 57–д жагссан, Латви улсын тэргүүлэх дээд боловсролын байгууллага юм. Тус их сургууль нь Латви улсын нийслэл Рига хотод байрладаг үндсэн 9 бүрэлдэхүүн сургуультайгаас гадна бусад муж хотуудад 8 салбар сургууль, судалгааны төвүүдтэй.
Тус сургуультай МУИС-ийн Хэрэглээний Шинжлэх Ухаан, Инженерчлэлийн Сургуулийн Мэдээлэл, компьютерийн ухааны тэнхим хамтран ажиллаж магистрын хамтарсан хөтөлбөр хэрэгжүүлж буй бөгөөд 2019-2021 оны хичээлийн жилд тус тэнхимийн 3 оюутан амжилттай суралцан МУИС-аас мэдээллийн технологийн ухааны магистрын зэрэг, Рига техникийн их сургуулиас инженерчлэлийн ухааны магистрын зэргийн хос диплом авсан юм.
Шинээр байгуулсан хамтын ажиллагааны гэрээний хүрээнд тус сургуультай багш, судлаач, оюутан, судалгааны мэдээ материал солилцох; хамтарсан судалгаа, сургалт, хурал, семинар зохион байгуулах; тэдгээрт оролцох; хамтарсан хөтөлбөр хэрэгжүүлэх; докторын түвшний сургалтад хамтарч ажиллахаар заасан тул багш, судлаачид та бүхнээс Рига техникийн их сургуультай хамтран ажиллах аливаа санал, санаачилгыг хүлээн авахдаа таатай байх болно.
ХАМТЫН АЖИЛЛАГААНЫ ХЭЛТЭС
