Бүгд Найрамдах Буриад Улсын Засгийн газрын гишүүн, Монгол Улстай хамтран ажиллах сайд Чирипов Даба-Жалсан Шагжиевич, Буриад улсын боловсрол, шинжлэх ухааны яамны Тэргүүн дэд сайд Сандакова Наталья Юрьевна, Буриадын их сургуулийн ректор Дамдинов Алдар Валерьевич тэргүүтэй бусад их дээд сургуулиудын ректоруудын зөвлөлийн 15 хүний өргөн бүрэлдэхүүнтэй төлөөлөгчид Монгол улсын их сургуульд зочиллоо.
Зочдыг МУИС-ийн захирал, дэд захирлууд болон хамтын ажиллагааны хэлтсийн дарга холбогдох албаны хүмүүсийн хамтаар хүндэтгэл үзүүлэн, найрсгаар хүлээн авч, талуудын хамтын ажиллагааны түүхэн уламжлал, өнөөгийн нөхцөл байдлын талаар харилцан мэдээлэл солилцлоо.
Улмаар МУИС-ийн Захирал Б.Очирхуяг Монголын ууган их сургуулийн түүхт 80 жилийн ой тохиож буй энэ цаг хугацаанд морилон ирсэн уламжлалт харилцаатай Буриадын их сургуулийн ректор Дамдинов Алдар Валерьевичид МУИС-ийн 80 жилийн ойн албан ёсны урилгыг гардуулав. Мөн эрхэм Ректор Дамдинов Алдар Валерьевич МУИС-ийн захирал Б.Очирхуягт Буриадын их сургуулийн 90 жилийн ойн урилгыг албан ёсоор гардуулан өгсөн юм.
Уулзалтын үеэр Буриад улсын их дээд сургуулиудын ректоруудын зөвлөлийн гишүүд болох Сизов Игорь Геннадьевич (Зүүн Сибирийн Технологи, Менежментийн Улсын Их Сургуулийн ректорын үүрэг гүйцэтгэгч), Елена Юрьевна Перова (Зүүн Сибирийн Улсын соёлын дээд сургуулийн ректор), Хайров Бари Галимович (Сибирийн Улсын харилцаа холбоо, мэдээлэл зүйн их сургуулийн ректор) нар тус тусын сургуулийн талаар танилцуулга хийж, цаашид хамтран ажиллах санал дэвшүүлснийг МУИС-ийн захирал Б.Очирхуяг хүлээн авч, Бүрэлдэхүүн сургуулиуддаа уламжлан хамтран ажиллахаа илэрхийллээ.
Хамтын ажиллагааны мэдээлэл:
Монгол улсын их сургууль болон Буриадын их сургууль хооронд хамтран ажиллах гэрээг 2017 онд шинэчлэн байгуулсан бөгөөд 5+5 жил үргэлжлэх ХА-ны урт хугацааны гэрээний хүрээнд багш, оюутан солилцоо, хамтарсан судалгаа, хурал, семинар зохион байгуулж ирсэн. Тухайлбал,
- 2017 МУИС, Гадаад хэлний төвтэй хамтарсан “Хэл соёлын солбилцол” ОУЭШХ
- 2017 МУИС-ийн ОУХНУС, ОХУ-ын Байгалийн улсын их сургуультай хамтран “Монгол, Оросын худалдаа эдийн засгийн хамтын ажиллагааны тулгамдсан асуудал” сэдэвт ЭШХ
- 2019 Буриадын Их Сургуулийн гадаад хэлний тэнхимийн багш хэл бичгийн ухааны доктор Раднаева Любовь Дашинимаевна “Онолын ба хавсрал хэлшинжлэл”, “Орчин цагийн туршил авианзүйн судалгааны арга барил ба тулгарч буй асуудлууд” сэдэвт лекц МУИС-д уншсан
- 2019 онд Буриадын их сургууль дээр “Байгаль нуурын бүс нутаг ба түүний хөрш зэргэлдээх газар орны нийгэм-экологийн асуудлууд” сэдэвт оюутны олон улсын онол практикийн VII бага хурал
Оюутан солилцооны мэдээлэл:
БИС-аас 2017-2018 онд 5 оюутан, 2018-2019 онд 9 оюутан, 2020-2021 онд 7 оюутан монгол хэлний бэлтгэл хөтөлбөрт суралцсан, цахимаар 1 оюутан суралцсан бөгөөд МУИС-аас одоогоор оюутан суралцаагүй байна.
МУИС-ийн орос хэлний салбарын мэдээлэл:
МУИС-д орос хэлний мэргэжилтэн анх 1954 оноос бэлтгэж эхэлсэн бөгөөд МУИС-ийн орос хэлний салбар 1958-2020 оны хугацаанд орос хэл, уран зохиолын багш, орос хэл, утга зохиол судлаач, орос хэлний багш, зөвлөлт судлаач, орос хэлний багш, орчуулагч, орос хэл, олон улс судлал, орос хэл шинжлэл, орос хэлний орчуулагч зэрэг мэргэжлээр бакалаврын зэрэгтэй 798 мэргэжилтэн бэлтгэсэн. 1958 оноос өнөөг хүртэл 100 гаруй багш, ЗХУ, ОХУ -ын 50 орчим эрдэмтэн профессор багш нар уригдан ажиллажээ.
МУИС-ийн орос хэлний салбар орос хэл, уран зохиолын багш мэргэжлээр хамгийн их буюу 327 мэргэжилтэн 1958,1959, 1969-1978 онуудад бэлджээ. Нийт төгсөгчдийн 21% буюу 168 нь орос хэл шинжлэл, 19% буюу 156 нь орос хэл утга зохиол мэргэжлээр суралцсан байна. Монгол улсын их сургууль 1979 онд орос хэлний орчуулагч хөтөлбөрөөр 23, 1996-2004 онд орос хэлний багш, орчуулагч хөтөлбөрөөр 89 мэргэжилтэн бэлджээ.
2021-2022 оны хичээлийн жилд орос хэлний багш /34/, орчуулагч /52 / мэргэжлээр 86 оюутан суралцаж байна.
ХАМТЫН АЖИЛЛАГААНЫ ХЭЛТЭС
