АНУ-ын Колорадо мужийн их сургуультай хамтран ажиллана 

Share Button

МУИС-ийн стратегийн төлөвлөгөөнд туссан “судалгааны их сургууль болох алсын хараа, “дэлхийн шилдэг их, дээд сургуулиудтай хамтран ажиллах” зорилтын хүрээнд гадаад хамтын ажиллагааг өргөжүүлж АНУ-ын Колорадо мужийн их сургуультай хамтран ажиллах санамж бичиг байгууллаа.   

Колорадо мужийн их сургууль (Colorado State University, https://www.colostate.edu/) нь 1870 онд байгуулагдсан байгаль, нийгэм, хүмүүнлэгийн ухаан, техник, технологи, инженерчлэл, хөдөө аж ахуй, анагаах ухааны чиглэлээр өргөн хүрээнд бакалавр, магистр, докторын түвшний хөтөлбөрүүд хэрэгжүүлдэг. Тус сургууль нь THE 2022 дэлхийн их сургуулиудын эрэмбээр 351д жагссан, АНУ-ын төрийн өмчит, судалгааны их сургууль бөгөөд цэвэр энергийн технологи, усны нөөц, хүрээлэн буй орчин судлал, мал эмнэлэг, халдварт өвчин, хавдар судлалын чиглэлээр дэлхийд тэргүүлэх байр суурь  эзэлдэг. Тус их сургууль нь АНУ-ын Колорадо муж улсын Форт-Коллинс хотод байрладаг бөгөөд гурван их сургуулийн хотхонтой.  

Тус сургуультай МУИС-ийн багш, судлаачид 1991 оноос хойш сургалт, судалгааны салбарт хамтран ажиллаж ирсэн. Мөн тус сургуулийн багш, судлаачид Монголын цаг уур, экосистем, хүрээлэн буй орчны судалгааны ажлаар Монголд болон МУИС-д ажиллаж ирсэн туршлагатай.   

Шинээр байгуулсан хамтын ажиллагааны санамж бичгийн хүрээнд тус сургуультай багш, судлаач, оюутан, судалгааны мэдээ материал солилцох; хамтарсан судалгаа, сургалт, хурал, семинар зохион байгуулах; тэдгээрт оролцох боломжтой болж байна. Мөн хоёр орны экологи, байгалийн нөөцийн судалгаа, хөдөөгийн бүс нутаг дахь нийгэм-экологийн даван туулах чадвар, тогтвортой хөгжилд чиглэсэн судалгаанд илүүтэй анхаарал хандуулан ажиллахаар тохиролцов. Шинээр байгуулсан хамтын ажиллагааны санамж бичгийн хүрээнд багш, судлаачид та бүхнээс Колорадо мужийн их сургуультай хамтран ажиллах аливаа санал, санаачилгыг хүлээн авахдаа таатай байх болно.  

ХАМТЫН АЖИЛЛАГААНЫ ХЭЛТЭС

Сул хараатай иргэдэд
зориулсан хувилбар
Энгийн хувилбар