МУИС-ийн стратегийн төлөвлөгөөнд туссан “дэлхийн шилдэг их, дээд сургуулиудтай хамтран ажиллах” зорилтын хүрээнд Америкийн Нэгдсэн Улсын Индиана их сургуультай (Indiana University) хамтран ажиллах гэрээ шинэчлэн гэрээ байгууллаа.
Индиана их сургууль нь 1820 онд байгуулагдсан, АНУ-ын Индиана муж улсын төрийн өмчит 9 их сургуулийг нэгтгэсэн их сургуулиудын нэгдэл юм. Тус сургууль нь нийгэм, хүмүүнлэг, байгалийн ухаан, инженерчлэл, технологи, урлаг, бизнес, анагаах ухаан зэрэг бүх мэргэжлийн чиглэлээр бакалавр, магистр, докторын 930 гаруй хөтөлбөрүүд хэрэгжүүлдэг, нийт 8700 гаруй профессор, багш ажиллаж, 110000 гаруй оюутан суралцдаг байна. Тус сургуулийн харьяанд 200 орчим судалгааны нэгж, хүрээлэн төвүүд ажилладгаас Сайнорын Дотоод Азийн судалгааны хүрээлэн (Sinor Research Institute for Inner Asian Studies), Дотоод Ази, Уралын байгалийн нөөцийн судалгааны төв (Inner Asian and Uralic National Resource Center), Төв Азийн гадаад хэлний төв (Center for Languages of the Central Asian Region) зэрэг нь Монгол судлалтай холбоотой судалгаа хийдэг, Монголын багш, судлаачидтай хамтран ажиллах боломжтой юм. Тус сургууль нь THE 2021 дэлхийн их сургуулиудын эрэмбээр 140-д жагссан, дэлхийн тэргүүлэх судалгааны их сургуулиудын нэг юм.
Тус сургуультай МУИС 2003 оноос хойш нийгэм, хүмүүнлэг, Монгол судлалын чиглэлд идэвхтэй хамтран ажиллаж ирсэн. Харин 2021 оны 9 дүгээр сард хамтын ажиллагааг сэргээхээр багш, судлаачдаас хамтын ажиллагааны санал авж, тус сургуулийн Гадаад харилцааны газрын удирдлагуудтай МУИС-ийн удирдлагууд цахим уулзалт хийсэн. Үүний хүрээнд шинэчлэн байгуулж буй хамтын ажиллагааны гэрээний дагуу багш, судлаач, оюутан солилцооны хөтөлбөр хэрэгжүүлэх, хамтарсан судалгааны төсөл санаачлах, хэрэгжүүлэх, эрдэм шинжилгээний мэдээ, материал солилцох зэргээр хоёр их сургуулийн үйл ажиллагаа, зорилгод нийцсэн бүх төрлийн хамтын ажиллагааг дэмжин ажиллахаар боллоо.
Шинээр байгуулсан хамтын ажиллагааны гэрээний хүрээнд багш, судлаачид та бүхнээс Индиана их сургуультай хамтран ажиллах аливаа санал, санаачилгыг хүлээн авахдаа таатай байх болно. Индиана их сургуулийн дэлгэрэнгүй мэдээлэлтэй тус сургуулийн цахим хуудаснаас https://www.iu.edu/index.html танилцана уу.
ХАМТЫН АЖИЛЛАГААНЫ ХЭЛТЭС
