БНСУ-ын Ханяан их сургуулийн Олон улсын газрын дэд дарга Дон Ил Ким, ахлах менежер Бокюн Ким нар 2022 оны 5 дугаар сарын 20-ны өдөр МУИС-д зочилж, хамтын ажиллагааг сэргээх, гэрээ байгуулах, тэтгэлэгт хөтөлбөр хэрэгжүүлэх боломжуудыг хэлэлцэв. Уулзалтад МУИС-ийн эрдэм шинжилгээ, хамтын ажиллагаа хариуцсан дэд захирал С.Должин, Хэрэглээний шинжлэх ухаан, инженерчлэлийн сургуулийн захирал Д.Бямбажав, Хамтын ажиллагааны хэлтсийн мэргэжилтэн Д.Мөнхтамир нар оролцов.
Ханяан их сургуультай МУИС 2005-2010 онуудад хамтын ажиллагааны гэрээтэй ажиллаж ирсэн бөгөөд МУИС-ийн багш нар тус сургуульд богино хугацаагаар ажиллаж байсан. Энэхүү уулзалтаар Ханяан их сургуулийн Эрика кампусын зүгээс хамтран ажиллах санамж бичгийг шинэчилж, оюутан солилцоо хэрэгжүүлэх, ахисан түвшний оюутнуудад зориулсан шинжлэх ухаан, инженерчлэлийн тэтгэлэгт хөтөлбөрийг хэрэгжүүлэх саналыг тавьсан юм.
МУИС-ийн зүгээс Ханяан их сургуультай хөгжүүлж ирсэн хамтын ажиллагааг сэргээж, юун түрүүнд байгалийн ухаан, инженерчлэлийн чиглэлд ахисан түвшний сургалт, судалгааны хүрээнд хамтын ажиллагааг хөгжүүлэх боломжтойг эрдэм шинжилгээ, хамтын ажиллагаа хариуцсан дэд захирал С.Должин онцоллоо.
Ханяан их сургууль (Эрика) нь БНСУ-ын Ансан хотод байрладаг, сургалт, судалгаа, аж үйлдвэрийн кластер кампус юм. Нийт 9 коллежтэй, түүнд 10,000 гаруй оюутан суралцдаг. Тус сургууль нь QS дэлхийн их сургуулиудын эрэмбээр 2020 онд 151-д, Азийн их сургуулиудын эрэмбээр 24-д жагссан байна. Ханяан их сургуулийн талаарх дэлгэрэнгүй мэдээллийг https://www.hanyang.ac.kr/web/eng цахим хуудаснаас үзнэ үү.
ХАМТЫН АЖИЛЛАГААНЫ ХЭЛТЭС
