Шведийн хаант улсын парламентийн тэргүүн дэд дарга тэргүүтэй төлөөлөгчид 2022 оны 5 дугаар сарын 24-нд МУИС-д айлчиллаа. Төлөөлөгчдийн бүрэлдэхүүнд Шведийн парламентийн тэргүүн дэд дарга Аса Линдестам, Олле Торелл, Хелена Бувенг, Маркус Вихел, Пер Ранхорн нарын парламентийн гишүүд, парламентийн гадаад харилцааны зөвлөх Мартин Брозек нар болон Монгол Улсын Их Хурлын тамгын газрын Гадаад харилцааны хэлтсийн ахлах зөвлөх М.Батболд нар байв.
Шведийн хаант улсын парламентийн төлөөлөгчдийг МУИС-ийн захирлын албан үүргийг түр орлон гүйцэтгэгч Б.Очирхуяг, Эрдэм шинжилгээ, хамтын ажиллагаа хариуцсан дэд захирал С.Должин, Хамтын ажиллагааны хэлтсийн дарга Д.Бадамдаш нар хүлээн авч уулзлаа.
Уулзалтаар МУИС-ийн захирал Б.Очирхуяг Шведийн парламентийн төлөөлөгчид өргөн бүрэлдэхүүнтэй МУИС-д айлчилж буйд талархал дэвшүүлээд, МУИС болон Шведийн их, дээд сургуулиудын хамтын ажиллагааны талаарх мэдээллийг танилцуулав. Мөн хамтын ажиллагааг хөгжүүлэхээр ажиллаж буй Уппсала их сургууль, Стокхолмын их сургууль зэрэг Шведийн тэргүүлэх их, дээд сургуулиудтай хамтран ажилахад дэмжлэг үзүүлж өгөхийг хүслээ.
Шведийн хаант улсын парламентийн гишүүд МУИС-ийн сургалт, судалгаа, гадаад хамтын ажиллагааны талаарх мэдээлэлтэй танилцаж, сонирхсон асуултууддаа хариулт авав.
ХАМТЫН АЖИЛЛАГААНЫ ХЭЛТЭС
