Европын холбооноос Монгол Улсад суугаа Төлөөлөгчийн газраас Сүхбаатарын талбайд “Европын өдөрлөг”-ийг 2022 оны 05 дугаар сарын 28-нд зохион байгууллаа. Тус өдөрлөгт Европын холбооноос Монгол Улсад суугаа Онц бөгөөд Бүрэн эрхт Элчин сайд, хатагтай Аксель Никэйз, Нийслэлийн Засаг дарга бөгөөд Улаанбаатар хотын Захирагч Д.Сумъяабазар, Европын холбооны орнуудаас Монгол Улсад суугаа Элчин сайд нар, Гадаад харилцааны яамны Европын газрын захирал Г.Баттунгалаг зэрэг албаны хүмүүс уригдан оролцсон юм.
Онц бөгөөд Бүрэн эрхт Элчин сайд хатагтай Аксель Никэйз өдөрлөгийг нээж хэлсэн үг хэллээ. Тэрээр “Монголчуудын хувьтай хүн хурнаар гэдэгчлэн бороотой өдөр бид “Европын өдөрлөг”-ийг зохион байгуулж байна. Өнөөдөр Европын холбооны гишүүн орнууд, боловсрол, соёлын байгууллагууд 70 асарт Монгол Улсад хэрэгжүүлж буй үйл ажиллагаа, тухайн улсыг төлөөлөх бараа бүтээгдэхүүнийг сурталчилж, олон нийтэд мэдээлэл хүргэж байна. Өдөрлөгийн үеэр Европын холбооны асраар зочилсон хүүхдүүдэд паспорт олгох бөгөөд бусад асраар зочлон тамга даруулан, “Европоор аялсан аяллынхаа” төгсгөлд бяцхан гарын бэлэг авах юм” гэв.
Нийтдээ 70 орчим байгууллага, төсөл хөтөлбөр оролцсон “Европын өдөрлөг”-т МУИС-ийн хамтран хэрэгжүүлж буй Европын холбооны санхүүжилттай Erasmus+TACMEE (TACMEE – TAckling the Climate change through Modernizing Environmental Engineering program) болон Erasmus+ARTEST ( Консорциум: http://artestproject.com/, МУИС: http://rpd.num.edu.mn/artest/) төслүүдийн багийнхан амжилттай оролцож, хүрэлцэн ирсэн хүмүүст хэрэгжүүлж буй үйл ажиллагаа, төслийн зорилгын талаар танилцууллаа.
